Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 145 Hüküm no: 174 Orijinal metin no: [99-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mülâyim bt. Abdullah’ın kocası Dilâver b. Abdullah ile muhâlaa ile boşandıkları Havâss-ı Aliyye kazâsı müzâfâtından kasaba-i Hasköy mahallâtından Turşucuzâde Hüseyin Çelebi mahallesi sâkinelerinden Mülâyim bt. Abdullah nâm hâtun meclis-i şer‘-i hatîr-i lâzımü’t-tevkīrde zevc-i muhâlı‘ı işbu râfi‘ü’l-kitâb Dilâve[r] b. Abdullah mahzarında ikrâr ve takrîr-i kelâm edip mezbûr Dilâver zevcim olup beynimizde şikāk ve adem-i vifâk vâki‘ olmağın zevcim mezkûr Dilâver zimmetinde mütekarrir ve ma‘kūdun aleyh olan altı yüz akçe mehr-i müeccelimden ve nafaka-i iddet-i mu‘ayyenemden ve me’ûnet-i süknâmdan fâriğa olmak üzre zevcim mezbûr Dilâver ile muhâla‘a-i sahîha-i şer‘iyye [ile] muhâla‘a edip ol dahi vech-i muharrer üzre olan hul‘ı kabûl eylediğinden sonra her birimiz hukūk-ı zevciyyete müte‘allika âharın zimmetini ibrâ-i âmm-ı kātı‘ü’n-nizâ‘[la] ibrâ ve iskāt eyledik dedikde mukırra-i mezbûre Mülâyim’in vech-i muharrer üzre cârî ve sâdıra olan ikrârını mezbûr Dilâver vicâhen tasdîk ve şifâhen tahkīk etmeğin [mâ hüve’l-vâki‘ bi’t-taleb ketb olundu]. Fî 28 min Recebi’l-ferd sene 1090. Şuhûdü’l-hâl: Osman Efendi b. Ali, Mehmed Bey b. Ali, Ali Çelebi b. Abdurrahman, Dilâver Bey b. Abdullah