Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 146 Hüküm no: 175 Orijinal metin no: [100-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa b. Sinan’ın bahçesinin Rumeli kazaskeri Abdülkâdir Efendi’nin oğlu Abdullah Efendi’ye satıldığı ve yanındaki çayırın da tasarruf hakkının devredildiği Husûs-ı âti’l-beyânın mahallinde ketb [ve] tahrîr-i iltimâs olunmağın savb-ı şer‘den mevlânâ Ali Efendi b. Davud irsâl olunup ol dahi asrında Rumeli kazaskeri olan merhûmü’l-mebrûr -ed-dâric ilâ medârici rahmeti rabbihi’l-gafûr- Abdülkādir Efendi’nin Havâss-ı Aliyye kazâsı müzâfâtından kasaba-i Hasköy mahallâtından el-Hâc Şaban mahallesinde vâki‘ bahçesine varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i şerîf eyledikde mahmiye-i İstanbul’da Baba Hasan Alemî mahallesinde sâkin sâbıkan zağarcıbaşı olan Hüseyin Ağa b. Sinan tarafından bey‘-i âti’z-zikri ikrâra vekîl olup İbrahim Beşe b. Hasan ve Câbi Mustafa Çelebi b. Hüseyin Efendi şehâdetleri ile şer‘an vekâleti sâbite olan Osman Ağa b. Ali Ağa meclis-i ma‘kūd-ı mezkûrda merhûm-ı mûmâ-ileyhin necl-i necîbleri olan umdetü’l-müderrisîni’l-kirâm ve zübdetü’l-muhakkikīni’l-fihâm sâhibü hâze’l-kitâb Abdullah Efendi mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilim müşârün-ileyh Hüseyin Ağa’nın silk-i mülk-i sahîhinde münselik olup zikr olunan el-Hâc Şaban mahallesinde vâki‘ iki tarafdan müşterî-i mûmâ-ileyh Abdullah Efendi ile birâderleri Ahmed Efendi bahçeleri ve bir tarafdan Yusuf Efendi b. Hüseyin Ağa bostanı ve bir tarafdan vâdi ta‘bîr olunur tarîk-ı âm ile mahdûd olup senede Sultan Bayezid Veli vakfı’na altı yüz akçe mukāta‘alı arsa üzerine mebnî iki bâb fevkānî ve iki bâb tahtânî odaları ve iki bahçıvan odalarını ve bi’r-i mâyı ve eşcâr-ı müsmire ve gayrı müsmire bahçeyi müştemil mülk bahçeyi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mûmâ-ileyh Abdullah Efendi’ye tarafeynden îcâb ve kabûlü hâvî şurût-ı müfsideden ârî iki yüz elli kıt‘a esedî guruşa bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eylediğinden sonra mârrü’z-zikr bahçeye muttasıl bir mikdâr çayır yerini ma‘rifet-i sâhib-i arz ile müvekkilim müşârün-ileyh Hüseyin Ağa müşterî-i mûmâ-ileyh Abdullah Efendi’ye yüz kırk esedî guruş bedel mukābelesinde tefvîz ve ifrâğ ol dahi ber vech-i muharrer tefevvuz ve kabûl eylediğinden sonra semen-i mezbûr iki yüz elli guruş ile bedel-i mezbûr yüz kırk esedî guruş ki cem‘an üç yüz doksan esedî guruşu müvekkilim müşârün-ileyh Hüseyin Ağa müşterî-i mûmâ-ileyh Abdullah Efendi yedinden bi’t-tamâm ve’l-kemâl ahz ü kabz eyleyip ba‘de’l-yevm hudûd-ı mezkûr ile mahdûd olan bahçede müvekkilim müşârün-ileyh Hüseyin Ağa’nın alâka ve medhali yokdur müşterî-i [101] mûmâ-ileyh Abdullah Efendi’nin mülk-i müşterâsı ve hakk-ı sarîhi olup ve zikr olunan çayır yeri dahi hakk-ı müfevvazı olmuşdur keyfe mâ yeşâ’ ve yahtâr mutasarrıf olsun dediğini mevlânâ-yı mezbûr mahallinde tahrîr ba‘dehû ma‘an ba‘s olunan Muhzır Ali Çelebi b. Abdurrahman ve Mehmed Bey b. Ali ile meclis-i şer‘a gelip her biri alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Tahrîren fî gurreti Şa‘bâni’l-mu‘azzam li sene tis‘în ve elf. Şuhûdü’l-hâl: Fahrü’l-müderrisîni’l-kirâm Süleyman Efendi b. Mustafa, Umdetü’l-müderrisîni’l-kirâm Seyyid Ali Efendi b. Abdülhalim Efendi, Mefharü’l-kuzât Mustafa Efendi b. Mehmed Efendi, Mehmed b. Abdullah, Hacı İbrahim Ağa b. Mehmed, Abdülbâkī Efendi b. Ahmed Efendi, Mehmed Ağa b. Ali Emin Ağa, Ali Çelebi b. Abdullah, Mustafa Çelebi b. Abdullah, Hasan b. Hüseyin, El-Hâc İslâm b. Abdullah