Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 147 Hüküm no: 176 Orijinal metin no: [101-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Varsan v. Vartan’ın Kumru v. Avanos’a terzilik yapıp iki aylık ücretini talep ve tahsil ettiği Fi’l-asl vilâyet-i Anadolu’da vâki‘ Tokat kazâsı ahâlîsinden olup hâlâ Havâss-ı Aliyye kazâsı müzâfâtından kasaba-i Hasköy mahallâtından Sütlüce mahallesinde müsâferet vechi üzre sâkin olan Varsan v. Vartan nâm Ermeni meclis-i şer‘de işbu râfi‘ü’s-sifr Kumru v. Avanos nâm Ermeni muvâcehesinde üzerine da‘vâ ve takrîr-i kelâm edip târih-i kitâbdan iki ay mukaddem mezbûr Kumru’ya terzilik san‘atında nefsimi beş esedî guruşa îcâr ol dahi vech-i muharrer üzre istîcâr ve kabûl eylediğinden sonra ücretimden mezbûr Kumru zimmetinde beş esedî guruş hakkım kalmağın taleb eylediğimde ol dahi ikrâr etmeğin hükm-i hâkim lâhık olmağın meblağ-ı mezbûr beş esedî guruşu mezbûr Kumru yedinden bi’t-tamâm ve’l-kemâl ahz ü kabz eyledim meblağ-ı mezbûr beş esedî guruşa müte‘allika cemî‘ da‘vâdan mezbûr Kumru’nun zimmetini ibrâ ve mezbûr Kumru dahi benim zimmetimi ibrâ-i âm ile ibrâ ve iskāt eyledi dedikde mukırr-ı mezbûr Varsan’ın vech-i muharrer üzre cârî ve sâdır olan ikrârını mezbûr Kumru vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene tis‘în ve elf. Şuhûdü’l-hâl: Halil b. Ali, Abdullah Çelebi b. Mehmed Bey, Süleyman Çelebi b. Ramazan, Mehmed Bey b. Abdullah, Ali Çelebi b. Abdurrahman, Dilâver Bey b. Abdullah, Hüseyin Çelebi b. Hasan