Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 148 Hüküm no: 177 Orijinal metin no: [102-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlyaz v. Aton’un Rus asıllı câriyesi Ene bt. Yuvan’ı azat ettiği Havâss-ı Aliyye kazâsı müzâfâtından kasaba-i Hasköy mahallâtından Pîrî Paşa mahallesi ahâlîsinden olup Alaman cemâ‘atinden İlyaz v. Aton nâm Yahudi meclis-i şer‘-i hatîr-i lâzımü’t-tevkīrde kendiye rıkkıyyetini mu‘terife olan işbu orta boylu açık kaşlı elâ gözlü Rûsiyyetü’l-asl bâ‘iset-i hâze’l-kitâb Ene bt. Yuvan nâm câriye-i memlûkesi muvâcehesinde ikrâr ve takrîr-i kelâm edip mevsûfe-i mezbûre Ene’yi târih-i kitâbdan sene-i âtiye Şevvâl’ine gelince bana istikāmet üzre lâ li-ivazin ‘âcil ve lâ li-garazin âcil malımdan âzâd ve sâir harâir-i asliyyât zümresine ilhâk eyledim ba‘de’l-yevm mevsûfe-i mezbûre üzerinde velâ-i şer‘îden gayrı hakkım bâkī kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şa‘bâni’l-mu‘azzam li sene tis‘în ve elf. Şuhûdü’l-hâl: Fahrü’l-akrân Mahmud Bey b. Mehmed Bey, Süleyman Çelebi b. Ramazan, Abdülbâkī b. Ömer, Abdullah Çelebi b. Mehmed Bey, Mustafa Çelebi b. Hüseyin, Ali Çelebi b. Abdurrahman, Dilâver Bey b. Abdullah el-Bevvâb