Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 148 Hüküm no: 178 Orijinal metin no: [102-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayandur v. Gülbeki’nin Mircan v. Şirvan’a sattığı Eğin’deki bağın bedelini talep davasının reddi Fi’l-asl vilâyeti Anadolu’da Eğin kazâsına tâbi‘ Hızırilyas nâm karye ahâlîsinden olup hâlâ Havâss-ı Aliyye kazâsı müzâfâtından kasaba-i Hasköy mahallâtından Turşucuzâde Hüseyin Çelebi mahallesinde sâkin Bayandur v. Gülbeki nâm Ermeni meclis-i şer‘de kasaba-i mezbûre mahallâtından Abdüsselâm mahallesi ahâlîsinden işbu râfi‘ü’s-sifr Mircan v. Şirvan nâm Nasrânî muvâcehesinde üzerine da‘vâ ve takrîr-i kelâm edip mezbûr Mircan’a karye-i mezbûrede vâki‘ hudûdu beynimizde ma‘lûm tahmînen ( ) dönüm bağımı iki yüz esedî guruşa bey‘ ve teslîm ol dahi vech-i muharrer üzre iştirâ ve tesellüm ve kabûl eylediğinden sonra semen-i mezbûrdan yüz yirmi esedî guruşu mezbûr Mircan yedinden ahz ü kabz edip semen-i mezbûrdan bâkī seksen esedî guruş mezbûr Mircan zimmetinde kalmağın meblağ-ı bâkī-i mezbûru taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Mircan cevâbında fi’l-hakīka müdde‘î-i mezbûrdan bağ-ı mezkûru iki yüz esedî guruşa iştirâ ve kabz edip semen-i mezbûr iki yüz esedî guruşu müdde‘î-i mezbûra def‘ ve teslîm eyledim deyû def‘ ile mukābele edicek isre’l-istintâk ve akībe’l-inkâr mezbûr Mircan’dan [103] def‘-i mezbûrunu mübeyyine beyyine taleb olundukda zikr olunan Turşucuzâde mahallesi ahâlîsinden Feraşet v. Bahtik ve Hanem v. Handek nâm Ermeniler li ecli’ş-şehâde meclis-i şer‘a hâzırân olup istişhâd olunduklarında fi’l- vâki‘ müdde‘î-i mezbûr Bayandur bağ-ı mezkûru mersûm Mircan’a iki yüz esedî guruşa bey‘ ve teslîm ol dahi vech-i muharrer üzre iştirâ ve tesellüm eylediğinden sonra semen-i mezbûr iki yüz esedî guruşu mezbûr Mircan müdde‘î-i mezbûr Bayandur’a bizim huzûrumuzda def‘ ve teslîm müdde‘î-i mezbûr Bayandur dahi mersûm Mircan’dan semen-i mezbûr iki yüz esedî guruşu ahz ü kabz eyledi biz bu husûsa bu vech üzre şâhidleriz şehâdet dahi ederiz deyû her biri edâ-yı şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri hayyiz-i kabûlde vâki‘ olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâdis min Şa‘bâni’l-mu‘azzam li sene tis‘în ve elf. Şuhûdü’l-hâl: Mehmed Bey b. Ali, Ali Çelebi b. Abdurrahman, Dilâver Bey b. Abdullah, Abdülbâkī b. Ömer