Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 154 Hüküm no: 186 Orijinal metin no: [107-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marziye Hâtun bt. Ramazan’ın ölen oğlu Süleyman’ın evindeki hissesini gelini Belkıs bt. Abdullah’a sattığı ve evin tamamının Belkıs’ın mülkü olduğu Havâss-ı Aliyye kazâsı müzâfâtından kasaba-i Hasköy mahallâtından Pîrî Paşa mahallesi sâkinelerinden bâ‘isetü’l-kitâb Marziye Hâtun bt. Ramazan tarafından bey‘-i âti’l-beyânı ikrâra vekîl olup zât-ı mezbûreyi ma‘rifet-i şer‘iyye ile ârifân olan Mehmed Ağa b. Mehmed ve Ahmed Çelebi b. Hasan nâm kimesne[ler] şehâdetleriyle şer‘an vekâleti sâbite olan İmâm Ali Efendi b. el-Hâc Mehmed meclis-i şer‘-i hatîr-i lâzımü’t-tevkīrde yine kasaba-i mezbûre mahallâtından Turşucuzâde Hüseyin Çelebi mahallesi sâkinelerinden Belkıs bt. Abdullah nâm hâtun tarafından dahi kezâlik vekîl olup mezbûreyi ma‘rifet-i şer‘iyye ile ârifân olan Ömer Çelebi b. Ahmed ve Mehmed Beşe b. Abdullah şehâdetleri ile şer‘an vekâleti sâbite olan Mehmed Ağa b. İsmail muvâcehesinde takrîr-i kelâm ve ta‘bîr ani’l-merâm edip müvekkilem mezbûre Marziye Hâtun’un oğlu olup bundan akdem vefât eden Süleyman nâm kimesne mezbûre Belkıs’ın zevci olmağla vefât eyledikde zimmetinde mütekarrir ve ma‘kūdun aleyh olan beş bin akçe mehr-i müecceline müteveffâ-yı mezbûrun muhallefâtından olup zikr olunan Turşucuzâde Hüseyin Çelebi mahallesinde vâki‘ bir tarafı Ömer b. Mustafa mülkü ve bir tarafı Deli Mustafa mülkü ve bir tarafı Yani nâm zimmî mülkü ve taraf-ı râbi‘i tarîk-ı âm ile mahdûd ve mümtâz olup iki bâb tahtânî oda ve bir sofa ve bi’r-i mâyı ve bahçe ve kenîfi müştemil olup nısf-ı şâyi‘i kendi mülkü olan mülk menzilin nısf-ı âharını dahi [108] mezbûre Belkıs Hâtun’a yedi bin dört yüz akçeye bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl eyledikden sonra semeni olan meblağ-ı mezbûrun iki bin dört yüz akçesini yedinden nakid alıp bâkī beş bin akçeyi mehr-i müeccelinden olan deyne takas edip ol dahi mukāssa ve kabûl eyledikden sonra ba‘de’l-yevm menzil-i mahdûd-ı mezbûr cümle tevâbi‘ ve levâhıkı ile mezbûre Belkıs Hâtun’un mülk-i müşterâsıdır keyfe mâ yeşâ’ ve yahtâr mutasarrıfe olsun dedi dedikde mukırr-ı mezbûrun bi’l-vekâle cârî ve sâdır olan ikrârını el-mukarru lehâ’l-merkūme bi’l-vekâle tasdîk etmeğin mâ vaka‘a gıbbe’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene tis‘în ve elf. Şuhûdü’l-hâl: İbrahim Efendi b. Murad el-İmâm, Hüseyin Beşe b. Mehmed, Mehmed Çelebi b. Siyavuş, Hasan Çelebi b. Hüseyin, Mustafa Çelebi b. Dilâver, Mehmed Bey b. Ali, Şahbaz b. Abdullah, Mustafa Çelebi b. Murad el-Müezzin, Ali Çelebi b. Abdurrahman