Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 155 Hüküm no: 187 Orijinal metin no: [108-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marziye Hâtun’un ölen oğlunun zevcesi Belkıs ile aralarındaki davada muhtelif eşya karşılığında sulh oldukları Havâss-ı Aliyye kazâsı müzâfâtından kasaba-i Hasköy mahallâtından Turşucuzâde Hüseyin Çelebi mahallesi sâkinelerinden Belkıs bt. Abdullah nâm hâtun tarafından vekîl olup mezbûreyi ma‘rifet-i şer‘iyye ile ârifân olan Ömer Çelebi b. Ahmed ve Mehmed Beşe b. Abdullah şehâdetleri ile şer‘an vekâleti sâbite olan Mehmed Ağa b. İsmail nâm kimesne meclis-i şer‘-i hatîr-i lâzımü’t-tevkīrde yine kasaba-i mezbûre mahallâtından Pîrî Paşa mahallesi sâkinelerinden işbu bâ‘isetü’l-kitâb Marziye bt. Ramazan nâm hâtun tarafından kezâlik vekîl olup mezbûrenin zâtını ma‘rifet-i şer‘iyye ile ârifân olan Mehmed Ağa b. Mehmed ve Ahmed Çelebi b. Hasan şehâdetleri ile şer‘an vekâleti sâbite olan İmâm Ali Efendi b. el-Hâc Mehmed muvâcehesinde ikrâr-ı tâm ve takrîr-i kelâm edip müvekkilem mezbûre Belkıs’ın merkūme Marziye Hâtun ile ba‘zı cihâza müte‘allik da‘vâ-yı şer‘iyyesi olmağla taleb sadedinde iken beynlerinde nizâ‘-ı küllî vâki‘ olmuş idi el-hâletü hâzihî tavassut-ı muslihîn ile da‘vâ-yı mezbûrdan altı dokuma yastık ve iki minder ve bir döşek ve üç yorgan ve sekiz sahan ve bir tencere ve bir sagīr kahve ibriği ve bir maşraba üzerine inşâ-i akd-i sulh ettiklerinde müvekkilem merkūme Belkıs dahi sulh-i mezbûru kabûl ve bedel-i sulh olan eşyâ-yı mezbûre[yi] Marziye Hâtun yedinden bi’t-tamâm alıp kabz edip husûs-ı mezbûra müte‘allik âmme-i de‘âvî ve mütâlebât ve eymân ve muhâsamâtdan mezbûre Marziye Hâtun’un zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hısâm ile iskāt eyledi ba‘de’l-yevm [109] husûs-ı mezbûra müte‘allik müvekkilem mezbûre Belkıs Hâtun’dan da‘vâ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde mukırr-ı mezbûrun bi’l-vekâle cârî ve sâdır olan ikrârını el-mukarru lehâ’l-merkūme bi’l-vekâle tasdîk etmeğin mâ vaka‘a gıbbe’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene tis‘în ve elf. Şuhûdü’l-hâl: es-Sâbikūn