Hasköy Mahkemesi 10 Numaralı Sicil (H. 1085 - 1090 / M. 1674 - 1679) cilt: 30, sayfa: 155 Hüküm no: 188 Orijinal metin no: [109-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Subaşının talebiyle Samuyel v. Salamon’un oğlu Salamon’un cesedinin keşfi ve yemek yerken düşerek öldüğünün anlaşıldığı Havâss-ı Aliyye kazâsı müzâfâtından kasaba-i Hasköy’de bi’l-fi‘l subaşı olan işbu râfi‘ü’l-kitâb el-Hâc Mehmed b. Mehmed meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip kasaba-i mezbûre mahallâtından Keçeci mahallesinde sâkin Samuyel v. Salamon nâm Yahudinin sulbî sagīr oğlu Salamon nâm sagīri târih-i kitâbdan bir gün mukaddem urup katl eylemişlerdir hâlâ maktûlen yatar taraf-ı şer‘den üzerine varılıp keşf ve tahrîr olunması matlûbumdur dedikde bu fakīr ve Haseki Ahmed Ağa b. Abdülkerim ve zeyl-i kitâbda muharrerü’l-esâmî olan müslimîn ile zikr olunan mahalle varıp hâlik-i mezbûra nazar olundukda âzâ-yı cevârihinin bir uzvunda eser-i cerâhat olmayıp ve aslâ yarası ve beresi dahi olmadığı zâhir ve müte‘ayyin oldukdan sonra vech-i helâki istihbâr olundukda fi’l-hakīka târih-i kitâbdan bir gün mukaddem ta‘âm ekl ederken bi emrillâhi te‘âlâ düşüp bi’l-…? hâlik olmuşdur deyû haber verdiklerinde vâki‘ü’l-hâl hıfzan li’l-makāl ketb ü tahrîr olundu. Fi’l-yevmi’t-tâsi‘ min şehri Ramazâni’l-mübârek li sene tis‘în ve elf. Şuhûdü’l-hâl: Yusuf Efendi b. Mustafa el-İmâm, Receb Beşe b. Nasuh, Ali Çelebi b. Abdullah, Emrullah b. Ömer, Hasan Bey bekçi-i harem, Fethi Beşe b. Musli