Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 124 Hüküm no: 88 Orijinal metin no: [18a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Ağa’nın Yenice Karasu kazasında bulunan tarla ve çayır yerlerini Halil Çavuş’a satması Vilâyet-i Rumili’nde Karasu Yenicesi kazâsına tâbi‘ Harem nâm karye ahâlîsinden olup mahmiye-i İstanbul’da Saraçhane kurbünde Dülgerzâde mahallesinde müsâferet tarîkı ile sâkin olan fahrü’l-eşbâh Abdi Ağa b. Sefer meclis-i şer‘-i şerîf-i enverde Dergâh-ı âlî çavuşlarından olup mahalle-i mezbûrede sâkin Halil Çavuş b. Mustafa muvâcehesinde ikrâr-ı tâm ve takrîr-i kelâm edip taht-ı tasarrufumda olup karye-i mezbûre sınırı dâhilinde vâki‘ inde’l-ahâlî ve’l-cîrân ma‘lûmü’l-hudûd ve tahmînen yüz dönüm tarla ve kazâ-i mezbûre tâbi‘ Koruköyü demekle ma‘rûf karye hudûdunda vâki‘ inde’l-ahâlî ve’l-cîrân ma‘lûmü’l-hudûd tahmînen yirmi dönüm <> çayır ve yine zikr olunan Koruköyü dâhilinde [18b] vâki‘ inde’l-ahâlî ve’l-cîrân ma‘lûm yedi dönüm tarlalarımın hakk-ı tasarruflarını ma‘rifet-i sâhib-i arz ile fıddî râyic fi’l-vakt kırk bin akçe bedel mukābelesinde mezbûr Halil Çavuş’a ferâğ ve tefvîz edip ol dahi vech-i muharrer üzere tefevvüz ve kabûl eyledikden sonra bedel-i tefvîz-i mezbûr kırk bin akçeyi mezbûr Halil Çavuş yedinden tamâmen ahz u kabz eyledim, ba‘de’l-yevm hudûd-ı mezbûr ile mahdûd olan tarlalar ve çayırları mahallinde zabt ve tasarrufa mezbûr Halil Çavuşu taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-işrîn min-Cumâdelâhire li-sene ihdâ ve semânîn ve elf. Şuhûdü’l-hâl: Mustafa Çelebi b. İbrahim, Osman Beşe bölük 43, Veli Beşe b. Abdullah, İbrahim Çelebi b. Abdullah, Musli b. Ahmed.