Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 125 Hüküm no: 89 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi iken Müslüman olan Ahmed’in Abraham v. Kamal aleyhindeki menzil davasında anlaşma sağlanması Mahmiye-i İstanbul’da Gürüz [Kadiz] cemâ‘atinden olup medîne-i Üsküdar’a tâbi‘ karye-i Kuzguncuk’da sâkin iken bundan akdem hâlik olan Salomon nâm Yahûdinin sulbî oğlu ve hasren vârisi olup babası mezbûr Salomon’un helâkinden sonra şeref-i İslâm ile müşerref olan Ahmed nâm kimesne meclis-i şer‘-i hatîr-ı lâzımü’t-tevkīrde yine karye-i mezbûre sükkânından Abraham v. Kamal nâm Yahûdinin sulbî kebîr oğlu ve tarafından ikrâr-ı âti’l-beyânı tasdîka vekîl olup vekâleti yedinde olan mazmûnu müsbet hüccet-i şer‘iyye ile sâbite olan işbu bâ‘isü’s-sifr Kemâl nâm Yahûdi muvâcehesinde ikrâr ve takrîr-i kelâm edip babam mezbûr Salomon hâl-i hayâtında silk-i mülk-i sahîhinde münselik olup karye-i mezbûrede vâki‘ bir tarafdan Mayer v. Yako nâm Yahûdi mülkü ve bir tarafdan sâhil-i bahr ve bir tarafdan tarîk-i âm ve bir tarafdan müvekkil-i mezbûru âhar mülkü ile mahdûde arsa-i hâliyesini müvekkil-i merkūm Abraham’a altı yüz otuz kıt‘a esedî guruşa bâtten bey‘ ve teslîm, ol dahi vech-i muharrer üzere iştirâ ve kabûl ve kabz ve tesellüm eyledikden sonra semen-i mezbûru kable’l-ahz hâlik olup ba‘dehû ben semen-i mezbûrun beş yüz otuz esedî guruşunu ahz u kabz edip yüz guruşunu almadın altı yüz otuz esedî guruşu tamâmen aldım deyü ikrâr edip hüccet verdiğimden sonra semen-i mezbûrun yüz guruşunu aldım deyü ikrârımda kâzibim deyü da‘vâ etdiğimde müvekkil-i mezbûr dahi ikrâr-ı sahîh ile ikrâr etmiş idin demekle beynimizde nizâ‘-ı küllî vukū‘undan sonra muslihûn tavassut edip vekîl-i mezbûr ile beynimizde dört bin akçe üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden ahz u kabz edip husûs-ı mezbûrda ve târîh-i kitâba gelince müvekkil-i mezbûr ve vekîl-i merkūm ile beynimizde cârî olan âmme-i hukūk-ı ma‘lûme ve mechûle da‘vâsından zimmetlerin ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Cumâdelâhire li-sene ihdâ ve semânîn ve elf. Şuhûdü’l-hâl: Mehmed Çavuş b. Abdullah, Mehmed Bey b. Abdullah, Abdi Çelebi b. Hüseyin, Mehmed Çelebi b. Bayezid, Şükrullah Bey b. Mustafa.