Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 126 Hüküm no: 90 Orijinal metin no: [18b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı esnafından Mustafa Beşe’nin kiracısı olduğu bostandaki mülk sebze ve meyve ağaçları ile sâir aletlerini Hüseyin Efendi’ye satması Bostancı tâifesinden olup umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam Hüseyin Efendi b. Hasan’ın mahmiye-i Kostantıniyye -humiyet ani’l-âfâti ve’l-beliyye- hısnı ebvâbından Edirnekapısı dâhilinde Sarmaşık mahallesinde vâki‘ beyne’l-ahâlî ve’l-cîrân ma‘lûmü’l-hudûd bostanında bostancısı ve müste’ciri olan Mustafa Beşe b. Abdullah nâm kimesne meclis-i şer‘-i şerîf-i Ahmedî ve mahfel-i dîn-i münîf-i Muhammedî’de müşârün-ileyh Hüseyin Efendi tarafından husûs-ı âti’l-beyâna vekîli olup mûmâ-ileyh Hüseyin Efendi’nin etbâ‘ından Osman Çelebi b. Hüseyin ve mahmiye-i mezbûrda Avratpazarı kurbünde Hobyar mahallesi sâkinlerinden Hasan Çavuş b. Abdullah nâm kimesneler şehâdetleriyle şer‘an vekâleti sâbit olan fahrü’l-akrân ve’l-ekfâ Ahmed Çelebi b. Mustafa nâm kimesne mahzarında bi’t-tav‘i’s-sâf ikrâr u i‘tirâf edip zikr olunan Bostan’da magrûse mülküm olan beynimizde adedi ma‘lûm eşcâr-ı gayr-ı müsmire ve yüz sekiz aded incir ağacı ve yüz yirmi aded avaz? ağacı ve altmış aded kaysı ve şeftâli ve zeytin ve elma ağaçları ve altmış aded dahi asma ve bağ kütüğü ve mezrû‘ ve nâbit dört tarla, ıspanak ve dört tarla şalgam ve dört tarla pırasa ve bir tarla soğan ve bir tarla sarımsak ve bir tarla kasîmi ve beynimizde ma‘lûmü’l-mikdâr gübremi ve zikr olunan bostan içinde el-ân mevcûd dört aded [de]mir beli ve iki tarak ve bir çapamı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile nakd-i râyici fi’l-vakt kırk üç bin akçeye bi-safkatin vâhidetin müvekkil-i mûmâ-ileyh Hüseyin Efendi’ye bey‘ ü teslîm edip ol dahi iştirâ ve kabûl ve kabz ve teslîm eyledikden sonra semeni olan meblağ-ı mezbûr kırk üç bin akçeye mukaddemâ kendi malımla imâret ve meremmet? eylediğim bostancı odası, <> ve su yolu ve ihdâs eylediğim parmaklığa masrûfe müte‘allıka da‘vâdan müvekkil-i mûmâ-ileyh Hüseyin Efendi’ye ibrâ-i âmm-ı katı‘u’n-nizâ‘ ile ibrâ eyledim, ba‘de’l-yevm zikr olunan bostanda kat‘an benim alâka ve medhalim kalmamışdır dedikde, gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Li-sene ihdâ ve semânîn ve elf. Şuhûdü’l-hâl: el-Hâc Mahmud Ağa b. Abdurrahman, Abdülhalim Efendi b. Davud, Hasan Çavuş b. Abdullah.