Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 126 Hüküm no: 91 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Derviş Ağa’nın varislerinin vefat eden Fahreddin Efendi’de olan alacaklarının terekeden tahsil olunması Vilâyet-i Anadolu’da bi’l-fi‘il medîne-i İzmir kādısı olan umdetü’l-mevâli’l-izâm Mehmed Efendi b. Mahmud b. Kemâleddin el-Cemâlî? kıbelinden hatt ü hâtemini hâvî bin seksen senesi Cumâdelûlâsı’nın yirminci günü ile müverrah Musli Efendi b. Ebubekir yedi ile nakl-i şer‘î vârid olup mazmûnu medîne-i İzmir sükkânından olup bundan mukaddem mahrûse-i Selanik’de muhassıl-ı emvâl iken fevt olan Derviş Ağa b. el-Hâc Ali’nin hasren vârisi olan sulbî kebîr oğulları emîrü’l-ümerâi’l-kirâm Mehmed Paşa ve zahrü’l-müderrisîn Mustafa Efendi ve kıdvetü’l-emâsil Osman Ağa ve sulbiye kebîre kızı fahrü’l-muhadderât Âişe Hatun’dan ale’l-vechi’l-âtî da‘vâ-yı sahîha-i şer‘iyye ile mesbûk istişhâd-ı şer‘î sudûrundan sonra udûl-ı Müslimîn ve sikāt-ı muvahhidînden olup medîne-i mezkûre sükkânından Süleyman Çelebi b. Mehmed b. Süleyman ve Mustafa Çelebi b. Ahmed b. Hüseyin nâm kimesneler nakl ü tahvîl için mahall-i cerh ve ta‘dîle hâzırân olup şöyle edâ-i şehâdet-i şer‘iyye eylediler ki müteveffâ-yı mezbûr Derviş Ağa târîh-i kitâbdan dokuz sene mukaddem hayâtında mahmiye-i İstanbul sâkinlerinden olup ba‘dehû vefât eden es-Seyyid Fahreddin Efendi nâm kimesneye hayâtında medîne-i mezkûrda bizim huzûrumuzda üç bin yüz kırk kıt‘a esedî guruş ikrâz ve teslîm, mezbûr es-Seyyid Fahreddin Efendi dahi istikrâz ve kabz etmiş idi, müsteşhidûn-ı mezbûrûn için meblağ-ı mezbûrdan babaları müteveffâ-yı mezbûrun hayâtında ahzını i‘tirâf etdiği dört yüz otuz guruşdan bâkī olan iki bin yedi yüz on guruşu müteveffâ-yı mezbûr es-Seyyid Fahreddin Efendi’nin tereke-i vâfiyesinden kabz eden veresesinden hakk-ı taleb ve ahz vardır biz bu husûsa bu vech üzere şâhidleriz şehâdet dahi [ederiz deyü] her biri şehâdet-i şer‘iyye etdiklerinde ba‘de ri‘âyet-i şerâiti’l-kabûl şehâdetleri kabûl olundukdan sonra müşârün-ileyh Mehmed Paşa ve Mustafa Efendi ve Osman Ağa ve Âişe Hatun’dan her biri ba‘de’t-tahlîfi’ş-şer‘î meblağ-ı bâkī-i mezbûr iki bin yedi yüz on esedî guruşu müteveffâ-yı mezbûr es-Seyyid Fahreddin Efendi’nin tereke-i vâfiyesine vaz‘-ı yed eden veresesinden taleb ve da‘vâ ve ahz u kabz ve kendüye îsâle mütevakkıf olan umûrun küllîsine mahmiye-i merkūme sükkânından fahrü’l-kuzât Musli Efendi b. Ebubekir’i kabûlüne mevkūfe vekâlet ile vekîl ve nâib-i menâb nasb u ta‘yîn etdiklerini hâvî bulunmağın kitâb-ı mezbûr nâkili merkūm Musli Efendi’nin taleb ve da‘vâ ile müteveffâ-yı mezbûr es-Seyyid Fahreddin Efendi’nin veresesinden tereke-i vâfiyesine vâzı‘ayi’l-yed olan es-Seyyid Ahmed Ağa ve es-Seyyid Abdullah Çelebi muvâcehesinde feth ü kırâet ve istintâk olundukda mezbûrân es-Seyyid Ahmed Ağa ve es-Seyyid Abdullah Çelebi kitâb-ı mezbûrun zeylinde olan hatt ü hâtem mûmâ-ileyh Mehmed Efendi’nin olduğunu münkir olmağla nâkil-i mezbûr Musli Efendi’den kitâb-ı mezbûrun zeylinde olan hatt ü hâtem hâlâ medîne-i mezbûre kādısı olan mûmâ-ileyh es-Seyyid Mehmed Efendi b. Mahmud b. Kemâleddin el-Cemâlî’nin olduğuna beyyine taleb olundukda kitâb-ı mezbûrun zeylinde isimleri mastûr olup yol şâhidleri olan Süleyman Yazıcı b. Mahmud ve Mustafa Çelebi b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka kitâb-ı mesfûru hâlâ medîne-i mezbûr kādısı olan mûmâ-ileyh Mehmed Efendi b. Mahmud b. Kemâleddin el-Cemâlî bizim üzerimize kırâet edip huzûrumuzda imzâ ve mühürleyip hatt [ü] hâtemine bizi işhâd eyledi. Biz kitâb-ı mezbûrun zeylinde olan hatt ü hâtem hâlâ medîne-i mezbûre kādısı olan mûmâ-ileyh Mehmed Efendi b. Mahmud b. Kemâleddin el-Cemâlî’nin hatt ü hâtemi olduğuna şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mezbûr Musli Efendi’nin vech-i muharrer üzere vekâletine ba‘de’l-hükm meblağ-ı bâkī-i mezbûr iki bin yedi yüz on esedî guruşu müteveffâ-yı mezbûr es-Seyyid Fahreddin Efendi’nin tereke-i vâfiyesinden vekîl-i mezbûr Musli Efendi’ye teslîm ve edâya mezbûrân es-Seyyid Ahmed Ağa ve es-Seyyid Abdullah Çelebi’ye tenbîh olunmağın mâ-vaka‘a bi’t-taleb ketb olundu. Fi’l-yevmi’l-hâmis aşer min-Cumâdelûlâ li-sene ihdâ ve semânîn ve elf. Şuhûdü’l-hâl: Mehmed Çelebi b. Abdullah, Mustafa Çelebi b. el-Hâc Ahmed, İbrahim Çelebi b. Ahmed, Şükrullah b. Mustafa, Abdi Çelebi b. Hüseyin.