Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 129 Hüküm no: 93 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia Hatun’un arsası vakıf mülk menzilini Ali b. İsa’ya satması Mahmiye-i İstanbul’da Haydarpaşa mahallesinde sâkine Râbia bt. el-Hâc Ali nâm hatun zâtını ma‘rifet-i şer‘iyye ile ârifân zevci Abdullah Çelebi b. Mahmud ve Ali Bey b. Oruç nâm kimesneler ta‘rîfleri ile mu‘arrefe oldukdan sonra meclis-i şer‘-i şerîfde işbu bâ‘isü’l-kitâb el-Hâc Ali b. İsa nâm kimesne mahzarında ikrâr ve takrîr-i kelâm edip arsasının senede Evliyâ Mehmed Efendi vakfına altı yüz akçe mukāta‘a-yı kadîmesi ve binâsı akd-i âti’z-zikrin sudûruna değin yedimde mülküm ve hakkım olup mahmiye-i mezbûrede Hızır Bey mahallesinde vâki‘ bir tarafdan ba‘zan Murtaza ve ba‘zan Ramazan nâm kimesneler mülkleri ve iki tarafdan tarîk-i âm ve bir tarafdan Ramazan ve Murtaza mülkleri mahdûd ve muhavvata-i hâriciyesi fevkānî iki bâb oda ve tahtânî bir ahur ve muhavvata-i dâhiliyesi tabaka-i ulyâsında iki bâb oda ve bir köşk ve bir tahta-pûş ve bir kenîf ve tabaka-i vüstâsında bir oda ve bir sofa ve bir câmekânlı bir hamam ve tabaka-i süflâsında bir kenîf ve bir su kuyusu ve bahçe ve beş dükkânları müştemil menzilimin arsasını izn-i mütevellî ile yüz esedî guruş bedel-i ferâğ mukābelesinde mezbûr el-Hâc Ali’ye ferâğ ve tefvîz ve teslîm ve ebniyesini dahi mezbûr el-Hâc Ali’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin iki yüz otuz esedî guruşa bey‘ ve teslîm, mezbûr el-Hâc Ali dahi tefevvüz ve iştirâ ve tesellüm etdiğinden sonra semen-i mezbûr ile bedel-i mezbûr cem[‘an]bin üç yüz otuz esedî guruşu bana edâ ve teslîm, ben dahi yedinden tamâmen ahz u kabz eyledim, min-ba‘d menzil-i mahdûd-ı mezbûrun arsası hakk-ı müfevvezidir emsâli gibi ve ebniyesi mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî-gurreti Cemâziyelâhire li-sene ihdâ ve semânîn ve elf. Şuhûdü’l-hâl: Mehmed Çelebi b. Ahmed, Mehmed Çelebi b. Mustafa, Hacı Mehmed b. Mehmed, Hacı Kasım b. Mehmed, el-Hâc Ahmed b. Said, Hüseyin Çelebi el-müezzin.