Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 130 Hüküm no: 95 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müslüman olan İbrahim Beşe’nin boşadığı eşinin zimmetini ibra etmesi Dergâh-ı âlî -dâme merci‘an li’l-e‘âlî- yeniçerilerinin otuz ikinci ağa bölüğüne mahsûs oda yoldaşlarından İbrahim Beşe b. Abdullah nâm kimesne meclis-i şer‘-i şerîfde mahrûse-i Galata muzâfâtından kasaba-i Hasköy’de Hanzâde Bahçesi demekle ma‘rûf bahçede sâkine mutallaka zevcesi Vartoki bt. Karabet nâm Nasrâniyenin li-ebeveyn karındaşı tarafından husûs-ı âti’l-beyâna vekîl olup vekâleti zâtını ma‘rifet-i şer‘iyye ile ârifân Kızıl v. Varsan ve diğer Kızıl Toros nâm zimmîler şehâdetleri ile şer‘an sâbite olan Arakil v. Karabet zimmî muvâcehesinde ikrâr ve takrîr-i kelâm edip târîh-i kitâbdan on sene mukaddem ben şeref-i İslâm ile müşerref olup mezbûre Vartoki’yi talâk-ı bâyin ile tatlîk edip âhar diyâra gitdiğimde mezbûre Vartoki yedinde kalan beynimizde ma‘lûm eşyâmı kabz-ı semene vekîl, ol dahi ba‘de’l-kabûl eşyâ-i mezbûremi beş bin akçeye bey‘ ve kabz-ı semen etmiş idi, hâlâ meblağ-ı mezbûr beş bin akçeyi müvekkile-i mezbûre yedinden bi’t-tamâm ahz u kabz eyledim. Min-ba‘d husûs-ı mezbûra müte‘allıka âmme-i da‘vâdan mezbûre Vartoki’nin zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Cemâziyelâhire li-sene ihdâ ve semânîn ve elf. Şuhûdü’l-hâl: Ömer Ağa b. Mahmud, Abdi b. Mahmud, Mustafa Çelebi b. el-Hâc Ahmed, Abdi Çelebi b. Hüseyin, Ramazan b. Mehmed.