Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 131 Hüküm no: 96 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Müezzin Mehmed Halife’nin Rus asıllı cariyesi Saliha’yı azat etmesi Mahmiye-i İstanbul hısnı ebvâbından Kumkapı dâhilinde Nişancı Paşa-i atîk mahallesi sükkânından Müezzin Mehmed Halîfe b. Sefer nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de ikrâr ve takrîr-i kelâm edip bana rıkkiyetini mu‘terife olan orta boylu açık kaşlı kara gözlü Rusiyyetü’l-asl bâ‘isetü hâze’l-kitâb Saliha bt. Abdülvahab nâm câriye-i memlûkemi hasbeten li’llâhi’l-aliyyi’l-a‘lâ ve haseneten li-rûhi rasûlihi’l-mu‘allâ târîh-i kitâbdan iki sene mukaddem malımdan tahrîr ve i‘tâk ve zümre-i harâir-i asliyâta idrâc ve ilhâk etmiş idim. Mevsûfe-i mezbûre târîh-i mezbûrdan berü hürre olup üzerinde velâ-yı şer‘îden gayrı hakkım kalmadı dedikde mâ-hüve’l-vaki‘ bi’t-taleb ketb olundu. Fi’l-yevmi’s-sâmin aşer min-Cemâziyelâhire li-sene ihdâ ve semânîn ve elf. Şuhûdü’l-hâl: Mehmed Efendi b. Mehmed el-imâm, es-Seyyid Hasan Çelebi el-attâr, es-Seyyid Mustafa Çelebi b. es-Seyyid Hasan, Hasan Beşe b. Mahmud, Mehmed b. Mustafa?