İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 79 Hüküm no: 34 Orijinal metin no: [3b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hızır ile boşandığı eşi Ömer b. Dursun birbirlerinde haklarının kalmadığı Mahmiye-i İstanbul’da Seydî Bey mahallesinde sâkine Fâtıma bt. Hızır nâm hâtun mahfil-i kazâda sâbıkan zevci olan hâmilü’l-kitâb Ömer b. Dursun muvâcehesinde ikrâr edip, bundan akdem bin akçe mehr-i müeccelim ve nafaka-i iddetim üzerine mezbûr ile muhâla‘a edip, ba‘dehû üzerinde iki bin yedi yüz akçe me’ûnet-i süknâm olup hâlâ meblağ-ı mezbûr iki bin yedi yüz akçemi ve beynimizde mukaddem cümle esbâbımı dahi yedinden alıp kabz eyledim, min ba‘d mezbûr Ömer Beşe’de bir akçe ve bir habbe hakkım bâkī kalmadı dedikde, mezbûr Ömer Beşe dahi ikrâr edip, benim dahi mezbûreye bin altı yüz akçe karzdan deynim olup ben dahi meblağ-ı merkūmu bi’t-tamâm yedinden alıp kabz eyledim, min ba‘d birbirimizde hak ve alâka kalmadı dediğinde, ba‘de’l-musâdaka işbu vesîka ketb ü tahrîr olundu. Tahrîr fi[‘t-târihi’]l-mezbûr. Şuhûdü’l-hâl: Mehmed Ağa b. Mahmud, Musli b. Çelebi İbrahim, Süleyman Efendi el-imâm, Mustafa Efendi b. Hamza, Sefer Efendi el-müderris, Mustafa b. Ali el-imâm, Sâlih b. Hızır el-müezzin, Mehmed b. Keyvan el-kayyım, Mehmed b. Abdullah, Süleyman b. Yusuf, Mustafa b. İbrahim, diğer Mehmed b. Keyvan el-kayyım, diğer Sâlih b. Cafer ve gayruhüm.