Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 131 Hüküm no: 97 Orijinal metin no: [20a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un eşi Abdülkerim Efendi’den muhâlaa yoluyla boşanması Mahmiye-i İstanbul’da Cebecibaşı mahallesinde sâkine Fâtıma bt. Osman Ağa nâm hatun tarafından hul‘ ve ibrâ-i âti’l-beyânı ikrâra vekîl olup vekâleti mezbûrenin zâtını ma‘rifet-i şer‘iyye ile ârifân mahalle-i mezbûrede sâkin Mehmed Efendi b. Mustafa ve Ömer Efendi b. Ali nâm kimesneler <> şehâdetleri ile şer‘an sâbite olan el-Hâc İsmail Çelebi b. Ali nâm kimesne meclis-i şer‘-i şerîfde müvekkile-i mezbûrenin zevci işbu bâ‘isü’l-kitâb fahrü’l-kuzât Abdülkerim Efendi b. Abdülaziz Efendi tarafından husûs-ı âti’l-beyâna vekîl olup vekâleti mahalle-i mezbûrede sâkin Mustafa Efendi b. İbrahim ve Yusuf Çelebi b. Ali nâm kimesneler şehâdetleri ile şer‘an sâbite olan Hasan Bey b. Ali nâm kimesne mahzarında ikrâr ve takrîr-i kelâm edip müvekkilem mezbûre Fâtıma zevci mezbûr Abdülkerim Efendi zimmetinde mütekarrir ve ma‘kūdün-aleyh olan otuz bin akçe mehr-i müecceli ve nafaka-i iddet-i mu‘ayyene-i ma‘lûmesi üzerine ve me’ûnet-i süknâsı dahi kendi üzerine olmak üzere müvekkil-i mezbûr Abdülkerim Efendi ile muhâla‘a-i sahîha-i şer‘iyye ile muhâla‘a olup ol dahi hul‘-ı mezbûru kabûl eyledikden sonra zevciyete müte‘allıka âmme-i da‘vâ ve mutâlebât ve eymân ve muhâsamâtdan her biri âharın zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Cumâdelâhire li-sene ihdâ ve semânîn ve elf. Şuhûdü’l-hâl: Mustafa Ağa b. Çorbacı, Hüseyin Çelebi b. Hüseyin, Ahmed Çelebi b. Abdülkerim, el-Hâc Ahmed, el-Hâc Mustafa b. Cafer el-müezzin.