İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 82 Hüküm no: 39 Orijinal metin no: [4a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çavuş’un alacaklı olduğu Marola ile borç ödenmesi Ali Çavuş b. Abdullah mahfil-i kazâda Marola bt. Harun nâm Yahudiyenin zevci ve tasdîk-i âti’l-beyâna vekîl olunup, bi mâ hüve nehcü’s-sübût şer‘an vekâleti sâbite olan Yakob v. Mosi nâm Yahudi mahzarında ikrâr ve takrîr-i kelâm edip, merkūme Marola zimmetinde beynimizde ma‘lûm çiftlik-bahâsından yedi bin yüz akçe hakkım olup bundan akdem taleb eylediğimde ikrâr edip vermekde ta‘allül etmekle beynimizde münâza‘ât vâkı‘a olmuş idi. Hâlâ tavassut-ı muslihîn ile meblağ-ı merkūmu iki bin beş yüz akçe üzerine inşâ’-i akd-i sulh ettiklerinde, ben dahi sulh-ı mezbûru kabûl ve bedel-i sulh olan meblağ-ı merkūmu bi’t-tamâm yedinden ahz u kabz edip meblağ-ı bâkīden zimmetini ibrâ ve ıskāt eyledim. Ba‘de’l-yevm husûs-ı mezbûra müte‘allik bi’z-zât benden veya vekîlimden da‘vâ sâdıre olursa lede’l-hükkâmi’l-kirâm mesmû‘a ve makbûle olmaya dedikde, mâ vaka‘a gıbbe’t-taleb kayd şüd. Tahrîren fi’l-yevmi’s-sânî ve’l-ışrîn min Safer li sene seb‘a ve ışrîn ve elf. Şuhûdü’l-hâl: Murad b. Mehmed, Mehmed b. Ahmed, Ahmed b. Ömer, Hamza Dede b. Mustafa, Mehmed b. Eyüb, Hızır b. Abdullah ve gayruhüm.