İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 83 Hüküm no: 41 Orijinal metin no: [4a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İzgoro v. Yorgi’nin Simo v. Yani’den alacaklı olduğu İzgoro v. Yorgi nâm zimmî mahfil-i kazâda Simo v. Yani nâm zimmî muvâcehesinde mezbûr Simo zimmetinde cihet-i karzdan iki bin dört yüz kırk akçe hakkım olup, şuhûd mahzarında ikrâr dahi etmişdir. Hâlâ taleb ederim dedikde gıbbe’s-suâl ve’l-inkâr ve talebi’l-beyyine Yani v. Yorgi ve Yorgi v. İsteman nâm zimmîler li ecli’ş-şehâde mahfil-i kazâya hâzırân olup istişhâd olunduklarında, fî-hakīka mezbûr Simo bizim huzûrumuzda müdde‘î-i merkūma cihet-i karzdan zimmetimde iki bin dört yüz kırk akçe vardır deyû ikrâr eyledi. Bu husûsa şâhidleriz şehâdet dahi ederiz deyû edâ-i şehâdet-i şer‘iyye edip şehâdetleri makbûle olmağın, mûcebince hükm olunup mâ vaka‘a [bi’t-taleb] ketb olundu. Fî 23 Safer sene [10] 27. Şuhûdü’l-hâl: Mehmed b. Musa, İbrahim b. Receb, Mustafa b. Cafer, Sinan b. Abdullah ve gayruhüm.