İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 83 Hüküm no: 42 Orijinal metin no: [4a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Panayot isimli oğlu dükkânda ölü bulunan Dimitri v. Mihal’in dükkân sahibi Todora v. Papa ile sulh olduğu Rumeli’nde kazâ-i Yenişehir nevâhîsinden Dağ Nâhiyesi’ne tâbi‘ Kresava nâm karye sâkinlerinden Dimitri v. Mihal nâm nasrâni meclis-i şer‘-i şerîfde işbu sâhibü’l-kitâb Todoro v. Papa nâm zimmî muvâcehesinde ikrâr ve ta‘bîr ani’l-merâm edip, mezbûr Todoro’nun şâkirdi olup sulbî oğlum olan Panayot nâm mürâhık târih-i kitâbdan kırk gün mukaddem mahmiye-i İstanbul’da Avratpazarı’nda mersûm Panayot [Todoro]’un dükkânında mecrûhan maktûl bulunduğu verâseti bana müstahık olmağın dem ü diyetine müte‘allik ba‘zı da‘vâmız olmuşdu. El-hâletü hâzihî tavassut-ı muslihîn ile husûs-ı mezbûru gıbbe inkâr on bin akçeye sulh olup, ben dahi sulh-ı mezbûru kabûl ve bedel-i sulh olan meblağ-ı mersûmu bi’t-tamâm mezbûr Panayot [Todoro] yedinden alıp kabz eyledim, zimmetinde husûs-ı mersûma müte‘allik olan cemî‘-i de‘âvî ve mütâlebât ve eymân ve muhâsamâtdan ibrâ-i âm ile ibrâ ve ıskāt-ı hak eyledim, ba‘de’l-yevm mazmûn-ı kitâba muhâlif benden veya vekîlimden da‘vâ sâdır olursa lede’l-hükkâmi’l-kirâm mesmû‘a ve makbûle olmaya dedikde, gıbbe’t-tasdîk vicâhen mâ vaka‘a ketb olundu. Tahrîren fî 24 min Saferi’l-hayr sene 1026. Şuhûdü’l-hâl: Haydar Ağa ez-Zaîm, Hüseyin b. Hasan, İnal? b. Abdullah, Mehmed b. Hızır, Mehmed Çelebi b. Ahmed, Mustafa b. Mustafa ve gayruhüm.