İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 84 Hüküm no: 44 Orijinal metin no: [4b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Köle olduğu iddia edilen Çerkez asıllı Fâtıma’nın hür olduğu İşbu sâhibetü’l-kitâb çatık kaşlı kara gözlü orta boylu sağ yanağı benli Sâliha bt. Abdullah nâm Çerkeziyyetü’l-asl mahfil-i kazâda kendiye mülkiyyet üzre vâzı‘atü’l-yed olan Ayşe bt. Abdullah muvâcehesinde takrîr-i da‘vâ edip, ben târih-i kitâbdan beş yıl mukaddem Subhiye bt. Cafer nâm hâtun memlûkesi iken beni mâlından âzâd etmiş idi. Mersûme Ayşe bana mülkiyyet üzre vaz‘-ı yed eder suâl olunup benden yedi ref‘ olunmasın taleb ederim dedikde, gıbbe’s-suâl merkūme Ayşe ben mezkûreyi târih-i kitâbdan bir buçuk yıl mukaddem idi Hasan nâm kimesneden otuz bin akçeye iştirâ eyledim, mersûme Subhiye’nin mu‘takası idiği ma‘lûmum değildir dedikde, müdde‘iyye-i merkūmeden da‘vâsına muvâfık beyyine taleb olundukda udûl-i Müslimînden Süleyman b. Mehmed el-yesârî ve Mustafa b. Abdullah ve Mehmed Bey el-Bevvâbü’s-sultânî li ecli’ş-şehâde meclis-i şer‘a hâzırûn olup, fi’l-hakīka mezbûre Sâliha mersûme Subhiye’nin silk-i mülkünde iken târih-i kitâbdan beş yıl mukaddem mâlından âzâd eyledi. Bu husûsa şâhidleriz şehâdet dahi ederiz deyû edâ-i şehâdet-i şer‘iyye edip, gıbbe’t-ta‘dîl şehâdetleri hayyiz-i kabûlde vâkı‘a oldukdan sonra mersûmenin ıtkına hükm olundu. Tahrîren fi’l-yevmi’s-sânî ve’l-ışrîn min Safer li sene seb‘a ve ışrîn ve elf. Şuhûdü’l-hâl: Mustafa b. Cafer, Musa b. İlyas, Musa b. Mehmed, Mustafa b. Hamza.