İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 85 Hüküm no: 45 Orijinal metin no: [4b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çavuş b. Abdullah’ın alacağının ödenmesinde Marola ile anlaştığı Hasan Çavuş b. Abdullah meclis-i şer‘de Mosi v. Yakob ve Mihayil v. Salamo[n] nâm Yahudiler muvâcehesinde takrîr-i kelâm edip, Marola bt. Harun nâm Yahudiye zimmetinde beynimizde ma‘lûm çiftlik-bahâsından on dört bin akçe hakkım olup, meblağ-ı merkūma mezbûrân Yahudiler emr ve kabûlü hâviye kefâlet ile kefîl olmuşlar idi. Bundan akdem meblağ-ı merkūmun altı bin dokuz yüz akçesini mezbûre Marola yedinden ahz u kabz edip yedi bin yüz akçesi zimmetinde kalmış idi. El-hâletü hâzihî meblağ-ı bâkī yedi bin yüz akçeyi dahi tavassut-ı muslihûn ile iki bin beş yüz akçeye sulh olup, bedel-i sulhu mezbûrenin yedinden ahz u kabz edip kefâletden mezbûrânın zimmetleri berî olmuşdur dedikde, gıbbe’t-tasdîki’ş-şer‘î mâ vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min Saferi’l-hayr li sene seb‘a ve ışrîn ve elf. Şuhûdü’l-hâl: Murad b. Mehmed, Mehmed b. Ahmed, Mustafa b. Hamza, Ahmed b. Ömer.