Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 132 Hüküm no: 98 Orijinal metin no: [20a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdi’nin vakıf menzilini oğlu Yusuf Çelebi’ye satması Mahmiye-i İstanbul’da Akşemseddin mahallesi ahâlîsinden Ahmed b. Abdi meclis-i şer‘-i şerîf-i enverde sulbî kebîr oğlu işbu râfi‘ü’l-kitâb Yusuf Çelebi b. Ahmed muvâcehesinde ikrâr ve takrîr-i kelâm edip zikri âtî akdin sudûruna değin silk-i mülkümüzde [20b] münselik olup mahalle-i mezbûrede vâki‘ bir tarafdan el-Hâc Nesli mülkü ve bir tarafdan Mustafa mülkü ve bir tarafdan İbrahim mülkü ve bir tarafdan Medîne-i münevvere -alâ-münevvirihâ efdalü’t-tahiyye- Vakfı ve bir tarafdan tarîk-i hâs ile mahdûd olup bir bâb tahtânî ve bir bâb fevkānî odaları ve iki sofa ve müşterek su kuyusu ve bahçe ve kenîfi müştemil olup merhûm ve mağfûrun-leh Sultan Bayezid Hân Vakfiyesinde beş akçe mukāta‘a-i zemîni olan mülk menzilimi oğlum mezbûr Yusuf Çelebi’ye üç yüz esedî guruşa tarafeynden îcâb ve kabûlü hâvî bey‘-i bâtt ile bey‘ ve teslîm edip ol dahi iştirâ ve tesellüm ve kabûl eyledikden sonra semeni olan meblağ-ı mezbûr üç yüz esedî guruşu oğlum mezbûr Yusuf Çelebi’ye hîbe-i sahîha-i şer‘iyye ile hîbe ve teslîm ve temlîk edip ol dahi meclis-i hîbede ittihâb ve kabûl ve temellük eyledi ba‘de’l-yevm menzil-i mahdûd-ı mezbûr oğlum mezbûr Yusuf Çelebi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Cemâziyelâhire li-sene ihdâ ve semânîn ve elf. Şuhûdü’l-hâl: Mehmed Efendi b. Mustafa el-müezzin, Hüseyin Bey b. Ebubekir, Yusuf Efendi el-imâm, Mustafa Çelebi b. Mustafa, fahrü’l-eimme Seydi Efendi.