İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 85 Hüküm no: 46 Orijinal metin no: [4b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mismarî Abdi Vakfı’na ait evin tamir keşfi Mahmiye-i İstanbul’da sâbıkan nakībü’l-eşrâf iken vefât eden merhûm es-Seyyid Ali Efendi’nin sulbî oğlu olan mefharü’l-mehâdîm ve’s-sâdât es-Seyyid Hasan Çelebi b. Ali Çelebi meclis-i şer‘a gelip bast-ı kelâm edip, merhûm Mismarî Abdi vakfından olup mahmiye-i merkūmede Süleymaniye mahallesinde vâki‘ lede’l-cîrân hudûdu ma‘lûm olup, süknâsı ulemâya meşrûta olmakla ber-mûceb-i şart-ı vâkıf mutasarrıf olduğum menzilin iki bâb fevkānî odalarının bir duvarı ve bir odanın ocağı bi’l-külliye münhedim olup ve bir duvarın dahi bir mikdâr yeri muhtâc-ı meremmet olmağın, kıbel-i şer‘den üzerine varılıp ne mikdâr akçe ile imâret ve meremmet olunup tahmîn olunmak taleb ederim dedikde, savb-ı şer‘den Mevlânâ Mahmud irsâl olunup, hâssa mi‘mârlarından Üstâd Mustafa zeyl-i kitâbda esâmisi mastûr olan bî-garaz Müslimîn ile mahall-i mezbûra varıp menzil-i mezbûrun vech-i meşrûh üzre ta‘mîre muhtâc olduğun müşâhede ettiklerinde, mi‘mâr-ı mezbûr tahmîn-i sahîh ile tahmîn edip zikr olunan iki duvarın taş ile mahdûden binâsına üç bin iki yüz kırk akçe ve ocağın müceddeden binâsına ve duvarının meremmetine beş yüz akçe ve sakflarının ve sâir yerlerinin imârına bin akçe cem‘an dört bin yedi yüz kırk akçe lâzımdır, meblağ-ı merkūm ancak kifâyet eder deyû haber verip ve sâir binâ ahvâline vâkıf olan Müslümanlar dahi tahmîn-i mezbûr üzre icmâ‘ vü ittifâk ettiklerini mevlânâ-yı mezbûr mahallinde tahrîr ve mahfil-i kazâda takrîr etmeğin, mâ hüve’l-vâki‘ ketb olundu. Tahrîren fî evâsıtı Saferi’l-hayr li sene seb‘a ve ışrîn ve elf. Şuhûdü’l-hâl: Hasan Halife b. Abdullah el-imâm, Mehmed b. Hüseyin el-müezzin, es-Seyyid Hüseyin b. es-Seyyid Âlim, Rüstem b. Abdullah, Süleyman Bâşe b. Abdullah er-râcil, Sinan b. Ramazan, el-Hâc Hüseyin b. Abdullah.