Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 132 Hüküm no: 99 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tezkireci Ahmed Efendi’ye olan borcunu ödeyerek rehin olan incisini geri alması hususunda Poliçeroni’ye tenbihte bulunulması Hüccet-i deyn ma‘a rehin Mahmiye-i İstanbul’da Ma‘cuncu kurbünde Kādıasker Mehmed Efendi mahallesi sükkânından iken bundan akdem vefât eden Tezkireci Ahmed Efendi b. Abdülkerim’in li-ebeveyn karındaşı oğlu ve hasren vârisi Abdülkerim Çelebi b. Hüseyin nâm kimesne meclis-i şer‘-i şerîfde Kastorya? [Kastilya] cemâ‘atinden Poliçeroni v. David nâm Yahûdi muvâcehesinde üzerine da‘vâ ve takrîr-i kelâm edip müteveffâ-yı mezbûr Ahmed Efendi hayâtında sekiz yüz kırk kıt‘a esedî guruşu merkūm Poliçeroni’ye ikrâz ve teslîm, ol dahi iktirâz ve tesellüm etdiğinden sonra inci askılı kırk bin akçe kıymetli bir çift zümrüd küpesini müteveffâ-yı mezbûra meblağ-ı mezbûr mukābelesinde rehin ve teslîm ol dahi irtihân ve tesellüm etdiğinden sonra kable’l-istîfâ mezbûr Ahmed Efendi fevt olup verâseti bana münhasıra olmağla suâl olunup rehn-i mezbûru kabza ve meblağ-ı mezbûru bana teslîme merkūm Poilnçeroni’ye tenbîh olunmak matlûbumdur dedikde, gıbbe’s-suâl mezbûr Polinçeroni cevâbında müteveffâ-yı mezbûrdan hayâtında sekiz yüz kırk kıt‘a esedî guruş ikrâz ve kabz edip meblağ-ı mezbûr mukābelesinde merkūm küpeyi rehn ve teslîm edip ve mezbûr Abdülkerim Çelebi’nin hasren vârisi olduğunu tâyi‘an ikrâr u i‘tirâf etmeğin mûcebince rehn-i mezbûru kabza ve meblağ-ı mezbûr sekiz yüz kırk kıt‘a esedî guruşu müdde‘î-i mezbûr Abdülkerim Çelebi’ye edâ ve teslîme mezbûre Polinçeroni’ye tenbîh olunup mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Yusuf Çavuş b. Şa‘bân el-mübâşir, İbrahim Çelebi b. Ahmed, Mustafa Çelebi b. Hacı Ahmed, Veli b. Mahmud.