İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 94 Hüküm no: 62 Orijinal metin no: [6a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hasan’ın arsasını kardeşi Emine’ye bağışlaması Mahmiye-i İstanbul’da Hüseyin Ağa mahallesinde sâkine Fâtıma Hâtun bt. Hasan meclis-i şer‘-i şerîfde işbu sâhibetü’l-kitâb Emine Hâtun bt. Hasan muvâcehesinde ikrâr ve ta‘bîr ani’l-merâm edip, mahmiye-i mezbûrede Şeyh Ebülvefâ zâviyesi kurbunda Papasoğlu mahallesinde vâki‘ bir tarafdan Mustafa Reis mülküne ve bir tarafdan Feridun Odaları demekle ma‘rûfe olan hucerâta ve bir tarafdan Memi Çelebi vakfına ve bir tarafdan tarîk-i âmma müntehî olup büyût-ı müte‘addideyi hâvî olan mülk menzilden mezbûr Mustafa Reis mülküne mülâsık tûlen otuz dört zirâ‘ ve arzan bir zirâ‘ arsayı ba‘de’l-ikrâr hibe-i sahîha-i şer‘iyye ile mezbûre Emine Hâtun’a hibe ve temlîk ve teslîm eyledim, ol dahi ittihâb ve kabz ve kabûl eyledi, ba‘de’l-yevm arsa-i mezbûre mülk-i mevhûbudur keyfe mâ yeşâ mutasarrıfe olsun dedikde, mukırre-i mezbûreyi ikrâr-ı meşrûhunda el-mukarru lehâ’l-mezkûre vicâhen tasdîk edicek, mâ hüve’l-vâki‘ gıbbe’t-taleb ketb olundu. Tahrîren fi’l-yevmi’l-ışrîn min Saferi’l-hayr li sene seb‘a ve ışrîn ve elf. Şuhûdü’l-hâl: Abdi Çavuş, Seydî Hasan Çelebi, Halil Efendi el-imâm, Musa Çelebi, el-Hâc Mustafa ve gayruhüm.