Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 133 Hüküm no: 100 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia, Ümmühani ve Mehmed Efendi’nin menzil hisselerini satmaları Husûs-ı âti’l-beyânın mahallinde tahrîri için iltimâs olunmağın savb-ı şer‘-i hatîrden Mevlânâ İbrahim Efendi b. Şa‘bân irsâl olunup ol dahi fahrü’l-akrân Ahmed Çelebi’nin Dârü’l-hilâfeti’l-aliyye Kostantıniyyetü’l-mahmiye’de Kırkçeşme kurbünde Sekbanbaşı mahallesinde sâkin olduğu menziline varıp zeyl-i kitâbda fahrü’l-esâmî olan Müslimîn huzûrlarında akd-i meclis-i şer‘-i şerîf etdiğinde mahmiye-i mezbûrede Yenibahçe kurbünde Karabaş mahallesinde vâki‘ bir tarafdan ba‘zan Mustafa Çelebi mülkü ve ba‘zan eş-Şeyh İbrahim Efendi Vakfı ve bir tarafdan Hürrem Çavuş Vakfı olan müteehhilîn odaları ve bir tarafdan Medîne-i münevvere Vakfı’ndan Hüseyin Bey evlâdı tasarruflarında olan menzil ve bir tarafdan ba‘zan Abdullah Çelebi menzili ve ba‘zan tarîk-i âm ile mahdûd dâhiliye ve hâriciyede büyût-ı adîde ve hadîka ve su kuyusunu müştemil olan mülk menzilin yirmi dört sehmden on yedi buçuk sehmi Râbia bt. el-Hâc Mustafa nâm hatunun ve beş buçuk sehmi Ümmühani bt. el-Hâc Nasuh nâm hatunun ve bir sehmi Hacı Mehmed b. Lutfullah nâm kimesnenin mülkü ve hakkı olduğu şer‘an sâbit oldukdan sonra mezbûrân el-Hâc Mehmed ve Ümmühani taraflarından husûs-ı âti’l-beyâna vekîl olup vekâleti mezbûre Ümmühani’nin zatını ma‘rifet-i şer‘iyye ile ârifân mahalle-i mezbûre İmamı Hasan Efendi b. Mustafa ve diğer Hasan Efendi b. Dede nâm kimesneler şehâdetleri ile sâbit olan Mehmed Ağa b. İbrahim nâm kimesne vekâleten ve mezbûre [21a] Râbia asâleten meclis-i ma‘kūd-ı mezbûrda fahrü’l-muhadderât sâhibete hâze’l-kitâb Saraylı Eğlence bt. Abdülvahab nâm hatun mahzarında her biri ikrâr ve takrîr-i kelâm edip menzil-i mahdûd-ı mezbûru cümle tevâbi‘ ve levâhıkı ve kâffe-i hukūk ve merâfıkı ile mûmâ-ileyhâ Eğlence Hatun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile dört yüz doksan esedî guruşa bey‘ ve teslîm ol dahi vech-i muharrer üzere iştirâ ve tesellüm ve kabz etdiğinden sonra semen-i merkūm dört yüz doksan esedî guruşu mûmâ-ileyhâ Eğlence Hatun yedinden bi’t-tamâm alıp ahz u kabz eyledik, min-ba‘d menzil-i mahdûd-ı mezbûr mûmâ-ileyhâ Eğlence Hatun’un mülk-i müşterâsıdır, keyfe mâ yeşâ ve yahtâr mutasarrıfe olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr, ba‘dehû ma‘an irsâl olunan Şa‘bân b. Hüseyin ve Receb Çelebi b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Cumâdelâhire li-sene ihdâ ve semânîn ve elf. Hasan Efendi b. Mustafa, Hasan Efendi b. Dede, Mustafa b. Hasan, Ali b. Şa‘bân kavukçu, Şa‘bân b. Hüseyin.