.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 110
Hüküm no: 93
Orijinal metin no: [9a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Raziye bt. Murad’ın boşandığı eşinde hakkının kalmadığı

Mahmiye-i İstanbul mahallâtından Sinan Ağa mahallesinde sâkine Raziye bt. Murad nâm hâtun meclis-i şer‘-i hatîr-i lâzımü’t-tevkīrde zevci olan bâ‘isü’l-kitâb Mustafa b. Mehmed tarafından âti’l-beyân vech-i üzre hul‘ ve ibrâya Hüseyin Bey b. Pervâne ve Himmet b. Mustafa şehâdetleriyle şer‘an vekâleti sâbite olan Mehmed b. Mustafa muvâcehesinde ikrâr-ı sahîh-i şer‘î edip, zevcim mezbûr Mustafa izin ve ma‘rifetimle mahalle-i mezbûrede vâki‘ olan mülk menzilin imâretine sarf ettiği sekiz bin akçeden ben dahi zimmetinde mehr-i müeccelden hakkım olan iki bin akçeden ferâğ üzre vekîl-i merkūm Mehmed ile muhâla‘a edip, zevciyyete ve sâir husûsa müte‘allik olan cemî‘-i de‘âvî ve mütâlebât ve eymân ve muhâsamâtdan her birimiz âharın zimmetini asâleten ve vekâleten ibrâ-i âm ile [ibrâ ettik dediklerinde] mâ hüve’l-vâki‘ ketb olundu. Tahrîr fi’l-yevmi’l-âşir min [şehri] Rebî‘ilevvel li sene seb‘a ve ışrîn ve elf.


Şuhûdü’l-hâl: Musa b. Hızır, Ahmed b. Abdullah el-cündî, Murad b. Mehmed, Hasan b. Abdullah ve gayruhüm.