Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 82 Hüküm no: 59 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin ev hissesini ve tarlalarını Veli Beşe’ye sattığı Vilâyet-i Anadolu’da Keşab kazâsına tâbi‘ Harani nâm karye sükkânından Ali Beşe b. Osman meclis-i şer‘-i hatîr-i lâzımü’t-tevkīrde işbu bâ‘isü’l-kitâb Veli Beşe b. Mahmud muvâcehesinde ikrâr ve takrîr-i kelâm edip karye-i mezbûrede vâki‘ olup bir tarafı Ali b. Osman mülkü ve bir tarafı Osman mülkü ve bir tarafı Mustafa mülkü ve bir tarafı tarîk-i âm ile mahdûd olan mülk bağçede ve içinde olan harâb mülk menzilinde olan hisse-i şer‘iyyemi mezbûr Veli Beşe’ye yüz kıt‘a riyâlî guruşa bey‘ edip ol dahi iştirâ ve kabûl eyledikden sonra yine karye-i mezbûre sınırı dâhilinde vâki‘ adedi beynimizde ma‘lûm ve hudûdu beynimizde ma‘lûm tarlalardan hisse-i şer‘iyyemi ma‘rifet-i sâhib-i arz ile on guruş mukābelesinde ferağ ve tefvîz ol dahi tefevvüz ve kabûl eyledikde semen-i mezbûr otuz guruş ile bedel-i ferağ olan on guruşu merkūm Veli Beşe yedinden bi’t-tamam ahz u istîfâ edip mahallinde mezbûru zabt ve tasarrufa mezbûru taslît eyledim dedikde mâ-vaka‘a fi’t-târîhi’l-mezbûr. Şuhûdü’l-hâl: Osman b. Mehmed, Kapıcı Mustafa b. İbrahim, Süleyman b. Yusuf, Ömer b. Ali, Mehmed b. Ali ve gayruhum.