Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 136 Hüküm no: 102 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin bağ, samanlık, bazı eşya ve hayvanlarını sattığı Vilâyet-i Anadolu’da İznikmid kazâsına tâbi‘ Yuvacık nâm karyede sâkin Mehmed Çelebi b. Abdullah nâm kimesne meclis-i şer‘-i şerîfde işbu râfi‘ü’s-sifr Bağdasar v. Şerbet nâm zimmî muvâcehesinde ikrâr ve takrîr-i kelâm edip akd-i âtî sudûruna değin mülküm olup karye-i mezbûrede vâki‘ bir tarafdan Mahmud Çelebi tarlası ve bir tarafdan Yelbeni nâm Ermeni bağı ve bir tarafdan Haşman bağı ve bir tarafdan Bogos nâm Ermeni bağı ile mahdûd beş dönüm bağımı ve ol bağ içinde olan bir samanhânemi ve ol samanhâne içinde samanı ve karye-i mezbûrede iki camus öküzünü ve iki saban demirimi ve bir araba zincirimi mezbûr Bağdasar’a bi-safkatin vâhidetin iki yüz esedî guruşa bey‘, ol dahi iştirâ ve tesellüm ve kabûl etdikde semen-i mezbûr iki yüz esedî guruşu mezbûr Bağdasar yedinden tamâmen ahz u kabz etdiğimden sonra tefvîz-i âti’z-zikrin sudûruna değin taht-ı tasarrufumda olup karye-i mezbûre sınırı dâhilinde vâki‘ her birinin hudûdu beynimizde ma‘lûm tahmînen elli keyl tohum istî‘âb eder beş kıt‘a tarlayı sâhib-i arz ma‘rifetiyle mezbûr Bağdasar’a yüz on esedî guruşa ferâğ ve tefvîz, ol dahi tefevvüz ve kabûl eyledikden sonra bedel-i ferâğ olan yüz on esedî guruşu dahi mezbûr Bağdasar yedinden tamâmen ahz u kabz eyledim, mebî‘-i mezbûru mahallinde kabza ve tarlaları mahallinde zabta mezbûr Badasar’ı taslît eyledim dedikde gıbbe’t-tasdîkı’ş-şer‘î [mâ-vaka‘a bi’t-taleb ketb olundu]. Fi’l-yevmi’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Mehmed Çelebi b. Ali, Diğer Mehmed Çelebi b. ( ), Ebubekir Reis b. ( ), Ahmed Ağa b. Ebubekir, Şükrullah Bey b. Mustafa, Bali b. Abdullah, Abdi Çelebi b. Hüseyin, Mehmed b. Ramazan.