Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 137 Hüküm no: 103 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako v. Miço’ya borcunu ödemesi için Dimitri v. Tanaş’a tenbih olunması Hüccet-i icâre Mahrûse-i Galata’ya tâbi‘ kasaba-i Tophane’de Beyoğlu mahallesi sükkânından Yako v. Miço nâm [zimmî] meclis-i şer‘-i şerîf-i enver ve mahfil-i dîn-i münîf-i ezherde Dimitri v. Tanaş nâm zimmî muvâcehesinde üzerine da‘vâ ve takrîr-i kelâm edip bundan akdem bir sene tamâmına değin üç bin akçe ücret ile mezbûr Dimitri meyhânecilik san‘atında nefsini îcâr edip ol dahi istîcâr ve kabûl edip bir sene hizmet etdiğimden sonra ücret-i mezbûrenin sekiz yüz akçesini yedinden alıp bâkī iki bin iki yüz akçe hakkımın mezbûr Dimitri’den suâl olunup alıverilmesi matlûbumdur dedikde gıbbe’s-suâl mezbûr Dimitri cevâbında müdde‘î-i mezbûra vech-i muharrer üzere cihet-i mezbûre bâkī iki bin iki yüz akçe zimmetinde vâcibü’l-edâ ve lâzımü’l-kazâ deyni olduğu bi-tav‘ihî ikrâr u i‘tirâf etmeğin mûcebince bâkī-i mezbûr iki bin iki yüz akçeyi müdde‘î-i mezbûra edâ ve teslîme mezbûr Dimitri’ye tenbîh olunup mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelâhire li-sene ihdâ ve semânîn ve elf. [Şuhûdü’l-hâl: ] Mehmed Çavuş b. Bayram el-mübâşir, İbrahim Çelebi b. Ahmed, Mehmed b. Ramazan, Abdi Çelebi b. Hüseyin, Manto v. Yani.