.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 119
Hüküm no: 109
Orijinal metin no: [11a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şaban b. Süleyman’ın vefat eden oğlu Mehmed’in mallarını vasîsi Hacı İbrahim’den teslim aldığı

Mahmiye-i İstanbul’da Yenikapı kurbunda Tarsus mahallesi sâkinlerinden Şaban b. Süleyman mahfil-i kazâda hâmilü’l-kitâb el-Hâc İbrahim b. Hüseyin mahzarında takrîr-i kelâm edip, bundan akdem vefât eden zevcem Sâkine bt. ( ) [den] tevellüd eden sagīr oğlum Mehmed’e mezbûr el-Hâc İbrahim kıbel-i şer‘den mansûb vasî olmakla, müteveffât-ı mezbûreden sagīre-i merkūmeye intikāl eden otuz bin akçeyi kabz etmişdi. El-hâletü hâzihî sagīr-i merkūm Mehmed dahi fevt olup verâseti bana münhasıra olmakla, vesâyeti hasebiyle kabz ettiği otuz bin akçeyi bi’t-tamâm mezbûr el-Hâc İbrahim yedinden ahz u kabz etdim, sagīr-i mezbûr malından yedinde bir akçe ve bir habbe bâkī kalmadı dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’l-hâdî aşer min [şehri] Rebî‘ilevvel sene 1027.


Şuhûdü’l-hâl: Murad b. Mehmed, Mustafa b. Cafer, Musa b. Mehmed, Nasûh b. Yusuf, Mahmud b. Bâli ve gayruhüm.