.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 125
Hüküm no: 118
Orijinal metin no: [12b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Meryem bt. Osman’ın hür olduğunu ispat etmesi

İşbu sâhibetü’l-kitâb açık kaşlı kara elâ gözlü orta boylu Meryem bt. Osman nâm hâtun mahfil-i kazâda kendüye mülkiyyet zu‘mu ile vaz‘-ı yed eden fahrü’l-a‘yân Mahmud Ağa b. Abdülmennân nâm zevvâk-ı sultânî muvâcehesinde üzerine da‘vâ edip, ben mahmiye-i İstanbul’da Nişâncı mahallesinde Bakkālzâde odalarında Ayşe Hâtun bt. Abdullah nâm hurretü’l-asldan tevellüd edip babam mezbûr Osman iken, mûmâ-ileyh Mahmud Ağa rakīk[a] olmak zu‘mu ile bana vaz‘-ı yed eder suâl olunup benden yedi ref‘ olunmak taleb ederim dedikde, gıbbe’s-suâl mezbûr Mahmud Ağa hîn-i cevâbda ben mezbûreyi Üsküdar Kazâsına tâbi‘ Karamürsel Nâhiyesi’nde Saraycık nâm karyeden Körpelioğlu İbrahim nâm kimesneden yedi bin akçeye iştirâ eyledim, vech-i meşrûh üzre hurretü’l-asl idiği ma‘lûmum değildir dedikde, mersûme Meryem’den da‘vâsını müsbite beyyine taleb olundukda, udûl-i Müslimînden Mustafa Halife b. Sefer el-müezzin ve Ahmed Halife b. Mustafa el-imâm li ecli’ş-şehâde meclis-i şer‘a hâzırân olup istişhâd olunduklarında, fi’l-hakīka mersûme Meryem zikr olunan odalarda mezkûre Ayşe’den tevellüd eyleyip anası hurre-i mezkûre Ayşe ve babası merkūm Osman’dır maskat-ı re’si zikr olunan odalardır kat‘â mezbûreye ve ebeveynine rıkk târî olmamışdır, bu minvâl üzre biz şâhidleriz şehâdet dahi ederiz deyû edâ-i şehâdet-i şer‘iyye ettiklerinde, gıbbe’t-ta‘dîl şehâdetleri hayyiz-i kabûlde vâkı‘a oldukdan sonra mûcib-i şehâdetleri ile mezbûrenin hürriyetine hükm olunup, mâ vaka‘a bi’t-taleb ketb olundu. Tahrîren fi’l-yevmi’l-hâdî aşer min [şehri] Rebî‘ilâhir li sene seb‘a ve ışrîn ve elf.


Şuhûdü’l-hâl: Hüseyin Dede b. Abdullah, Mehmed b. Evliyâ, Himmet b. Mustafa, Murad [b.] Mehmed ve gayruhüm.