Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 138 Hüküm no: 105 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in varislerinden borç alan Mehmed Çelebi’ye borcunu ödemesi hususunda tenbihte bulunulması Vesâyeten da‘vâ ve’l-ikrâr Mahmiye-i İstanbul’da Kādıaskerî Mehmed Efendi mahallesinde sâkin iken bundan akdem vefât eden Mehmed b. Mustafa’nın sulbî sagīr oğlu Mustafa ve sulbiye sagīre kızı Hadîce’nin tesviye-i umûrlarına kıbel-i şer‘den mansûb vasîleri olan işbu bâ‘isü’l-kitâb es-Seyyid Mehmed Çelebi b. es-Seyyid Nasuh nâm kimesne meclis-i şer‘-i hatîr-ı lâzımü’t-tevkīrde Mehmed b. Rasûl nâm kimesne mahzarında üzerine bi’l-vesâye da‘vâ ve takrîr-i kelâm edip mezbûr Mehmed zimmetinde sagīrân-ı mezbûrân mallarından elli kıt‘a esedî guruş ve altı ayda üzerine devr-i şer‘î ve ilzâm-ı ribh olunan üç esedî ve üç rub‘ guruş ki cem‘an elli üç esedî ve üç rub‘ guruş olmağla meblağ-ı mezbûru taleb ederim, suâl olunsun dedikde gıbbe’s-suâl, mezbûr Mehmed cevâbında fi’l-hakīka sagīrân-ı mezbûrân mallarından elli kıt‘a esedî guruş ve altı ayda üzerime devr-i şer‘î ile ilzâm-ı ribh olan üç esedî ve üç rub‘ guruş ki cem‘an elli üç esedî ve üç rub‘ guruş sagīrân-ı mezbûrâna zimmetimde vâcibü’l-edâ ve lâzımü’l-kazâ deynim vardır deyü ikrâr etmeğin mûcebince meblağ-ı mezbûr elli üç esedî ve üç rub‘ guruşu vasiyy-i mezbûra edâ ve teslîme mezbûr Mehmed’e tenbîh birle mâ-vaka‘a bi’t-taleb ketb olundu. Fi’l-yevmi’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Abdi Çelebi b. Hüseyin, Şükrullah Bey b. Mustafa.