.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 129
Hüküm no: 127
Orijinal metin no: [13b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ölen Yorgi Reis’in Praktamine v. Dimitri’ye olan borcunun terekesinden ödenmesi

Hâmilü’l-kitâb Praktamine v. Dimitri nâm zimmî mahfil-i kazâda kazâ-i Havâss-ı Kostantıniyye müzâfâtından medîne-i Makrihor sâkinlerinden iken hâlik olan Yorgi v. Yekşe nâm zimmî reisin zevce-i metrûkesi Dökine bt. Kosta nâm nasrâniyye tarafından husûs-ı âtiyeye vekîl olup, şer‘an sâbitü’l-vekâlesi oldukdan sonra sulbiye kızları Rantese ve Anasta ve İrine nâm sagīrelerine dahi kıbel-i şer‘den mansûb vasîleri olan Musa b. Receb nâm kimesne mahzarında takrîr-i da‘vâ edip, hâlâ mezbûr Musa’nın vekâlet ve vesâyeti hasebiyle yedinde olan sekiz zirâ‘ olan Karamürsel demekle ma‘rûf sefîne yirmi sehim olup, beş sehmi cemî‘-i âlât-ı lâzımesiyle şâyi‘an benim mülküm olduğundan mâ‘adâ hâlik-i mezbûra hâl-i hayâtında bidâ‘ tarîkiyle üç bin akçe verip, ol dahi kabz edip, mezbûr Yorgi hâlik olmağla, sefîne-i mezbûrede olan beş sehim hisse-i şâyi‘amdan kasr-ı yed edip meblağ-ı merkūm üç bin akçeyi hâlik-i merkūmun metrûkâtından taleb eyledikde, vasî ta‘allül eder vech-i merkūm üzre kasr-ı yed etdirilip meblağ-ı merkūm alıverilmek murâd ederim dedikde, gıbbe’s-suâl mezbûr Musa cevâbında sefîne-i mezbûre hâlik-i mezbûrun müntakil mülkü olmağla vaz‘-ı yed ederim, müdde‘î-i mezbûrun beş sehmi vech-i muharrer üzre mülkü olduğun ve hâlik-i mezbûr zimmetinde bidâ‘ tarîkiyle üç bin akçe olduğun bilmem deyû inkâr edicek, müdde‘î-i mezbûrdan müdde‘âsını müsbite beyyine taleb olundukda, udûl-i Müslimînden Hüseyin Çavuş b. Kasım ve Mustafa Beşe b. Abdullah li ecli’ş-şehâde hâzırân olup istişhâd olunduklarında, fi’l-hakīka sefîne-i mezbûre yirmi sehim olup beş sehmi cemî‘-i âlât-ı lâzımesiyle müdde‘î-i mezbûrun şâyi‘an mülkü olduğundan mâ‘adâ müdde‘î-i mezbûr bidâ‘ tarîkiyle hâlik-i mezbûra üç bin akçe verip ol dahi kabz etdi. Biz bu husûsa minvâl-i meşrûh üzre şâhidleriz şehâdet dahi ederiz dediklerinde, gıbbe’t-ta‘dîl ve’t-tezkiye şehâdetleri makbûle oldukdan sonra zikr olunan beş sehim hisse-i şâyi‘asın hâlik-i mezbûr hâl-i hayâtında bey‘ etmeyip vücûh-ı şer‘iyyeden bir vechile mülkünden ihrâc etmediğin ve meblağ-ı merkūmu hâlik-i mezbûrun kendiden veya vekîlinden almayıp ve taraf-ı şer‘iyyeden bir tarîkle zimmetin ibrâ ve ıskāt etmediğine müdde‘î-i mezbûra yemîn teklîf olundukda, ol dahi alâ vefki’l-mes’ûl yemîn billâhi’llezî enzele’l-incîle alâ İsa aleyhi’s-selâm etmeğin mûcibi ile hükm olunup, mâ vaka‘a gıbbe’t-taleb ketb ü tahrîr olundu. Tahrîren fi’l-yevmi’l-âşir min şehri Rebî‘ilevvel min şühûri sene seb‘a ve ışrîn ve elf.


Şuhûdü’l-hâl: Osman b. Abdullah, Murad b. Mehmed, Musa b. Mehmed, Mustafa b. Mehmed, Mustafa b. Cafer ve gayruhüm.