|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 130 Hüküm no: 128 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sinan Çavuş Vakfına ait evdeki kiracıların kullanım alanlarıyla ilgili dava
Yakob v. Nersis mahfil-i kazâda Belkıs bt. Aslan nâm zimmîye muvâcehesinde takrîr-i da‘vâ edip, mahmiye-i İstanbul’da Çakır Ağa mahallesinde vâki‘ merhûm Sinan Çavuş Vakfı olan menzilin bir bâb tahtânî ve bir bâb fevkānî odası benim taht-ı icâre ve tasarrufumda olup ve iki fevkānî oda ve iki sofa ve kiler ve altında ahır ve selâmlık ve bi’r-i mâ mezbûre Belkıs’ın taht-ı icâre ve tasarrufunda olup, el-hâletü hâzihî mersûme Belkıs beni menzil-i merkūmda hayâtında ve kapısında mürûra mâni‘ olur suâl olunup mümâna‘atdan men‘ olunmasın taleb ederim dedikde, gıbbe’s-suâl mezbûre Belkıs zikr olunan hayât ve kapı benim taht-ı icâremde olan menzil haddinde dâhildir tarafeynin temessüklerine nazar olunup mûcebiyle amel olunmasına tenbîh olunsun dedikde, tarafeynin yedinde olan mütevellî temessüklerine nazar olundukda, mezbûrenin takrîrine mutâbık olmağın mezbûr Yakob ta‘arruzdan men‘ olunup, mâ vaka‘a ketb olundu. [Fi’l-yevmi’]t-tâsi‘ [min şehri] Rebî‘ilevvel li sene seb‘a ve ışrîn ve elf.
Şuhûdü’l-hâl: Hamza b. Abdullah, Ahmed b. Abdullah, Hasan b. el-Hâc Şaban, Ahmed b. Sinan, Ayvad b. Sinan.
|