|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 131 Hüküm no: 129 Orijinal metin no: [13b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yusuf b. Sâdık’ın oturduğu evi tamir etmesine izin verildiği
Mahmiye-i İstanbul’da Gül Câmi‘i mahallesinde sâkin râfi‘ü’l-kitâb Yusuf b. Sâdık meclis-i şer‘-i kavîmde sevk-i kelâm edip, mahalle-i mezbûrede vâki‘ mülk menzilin içinde olan kârgir kâfiriyyü’l-binâ kemer mürûr-ı eyyâmla harâbe müşrif olup münhedim olması mukarrer olmağın, altına duvar binâ etmek istedikde Sirkeci Emir vakfına mütevellî olan Abdi Çavuş mâni‘ olur. Hâlâ kıbel-i şer‘den üzerine varılıp vâki‘ hâl mahallinde görülmek taleb ederim dedikde, savb-ı şer‘den Mevlânâ Mahmud Efendi irsâl olunup hâssa mi‘mârlardan Üstâd Ali ve Üstâd Mustafa ve zeyl-i kitâbda esâmisi mastûr olan bî-garaz Müslimîn ile mahall-i mezbûra varıp, mütevellî-i mezbûr ihzâr ve istintâk olundukda cevâb verip, zikr olunan kemerin altı yanında şatrancî hesâbınca on sekiz zirâ‘ olan arsamı vakf-ı mezbûrdan olan at değirmeninin tetimmesinde olmak üzre zabt ederim deyip, lâkin müdde‘âsını isbâta kādir olmamağın, mi‘mârân-ı mezbûrân mesâha edip, zikr olunan kemerin arzı binâ zirâ‘ı ile üç zirâ‘ olup ol mikdâr altında vâki‘ olan arsa dahi kemere tâbi‘dir deyû haber verdiklerinden mâ‘adâ a‘yân-ı mahalle-i mezbûreden cemm-i gafîr meclis-i şer‘-i münîrde hâzırûn olup, fi’l-hakīka arsa-i mezbûre kadîmden arz-ı hâliye olup zikr olunan at değirmene muttasıl tahta havlusu olup mezkûr yere mâlik olanlar zabt edegelmişler iken, mezbûr Sirkeci Emir tahta havluyu fuzûlen kaldırıp tarîk-i âm tarafına taş duvar binâ etmekle zabt eylemişdi deyû ihbâr ettiklerine binâen, mütevellî-i mezbûr bî-vech ta‘arruzdan men‘ olunduğunu mevlânâ-yı mezbûr mahallinde tahrîr ve mahfil-i kazâda takrîr etmeğin, mâ vaka‘a [ketb olundu.] [Fi’l-yevmi’r-]râbi‘ [min şehri] Rebî‘ilevvel li sene seb‘a ve ışrîn ve elf.
Şuhûdü’l-hâl: Fahrü’l-e’imme Mehmed Efendi eş-şehîr Mecâzî, Mehmed Çelebi b. el-Hâc Hasan el-müezzin, el-Hâc Emirşah b. Ali, Ahmed b. Ali ve gayruhüm.
|