|
İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 132 Hüküm no: 131 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Efendi Vakfı’na ait Hacı Sultan’ın tamir ettirdiği evin keşfi
Mahmiye-i İstanbul’da vâki‘ merhûm Mehmed Efendi vakfına bi’l-fi‘il mütevellî olan Ahmed Çelebi b. Muharrem mahfil-i kazâda bâ‘isü’l-kitâb el-Hâc Sultan b. el-Hâc Mansur mahzarında takrîr-i kelâm ve bast-ı merâm edip, vakf-ı mezbûrdan olup mahmiye-i mezbûrede Hatîb Muhyiddin mahallesinde vâki‘ bir tarafı vakf-ı mezbûra ve bir tarafı Hatîb Muhyiddin vakfına ve bir tarafı süknâsı mahalle-i merkūme müezzinine meşrûta olan menzile ve taraf-ı râbi‘i tarîk-i âmma müntehî olup, iki bâb odaları ve altlarında bir mahzeni müştemil olan menzil icâre-i mu‘accele-i ma‘lûme ve ayda kırk akçe icâre-i müeccele ile mezbûr el-Hâc Sultan’ın tasarrufunda idi. Lâkin menzil-i mezkûr sâbıkan büyût-ı müte‘addideyi müştemil iken mürûr-ı eyyâm ve kürûr-ı a‘vâm ile harâbe müşrif olup müceddeden binâya cânib-i vakıfdan müsâ‘ade olmamağın, merkūm el-Hâc Sultan üslûb-ı sâbık üzre kendi malıyla binâ edip ba‘dehû ne mikdâr meblağ sarf olunursa icâre-i mu‘accelesine mahsûb ve icâre-i müeccelesi ayda otuz akçe olmak üzre izin vermişdim. Hâlâ mezbûr el-Hâc Sultan menzil-i mezkûru kemâ yenbağī müceddeden binâ etmeğin kıbel-i şer‘den âdem gönderilip ne mikdâr meblağ ile tecdîd olunduğu tahmîn ve mertebe-i tahammülü görülüp tahrîr olunmasın taleb ederim dedikde, cânib-i şer‘-i kavîmden fahrü’l-müderrisîni’l-kirâm Ahmed Efendi b. el-merhûm Abdülhalîm Efendi irsâl olunup hâssa mi‘mârlardan Musli Çelebi b. Hüsameddin ve Ali ve zeyl-i kitâbda isimleri mastûr olan Müslimîn ile üzerine varılıp nazar olundukda, fi’l-vâki‘ menzil-i merkūmda vâki‘ mahzenin üzerinde iki bâb ve onların üzerinde üç bâb odalar müceddeden binâ olunmuş bulunup, cümlesinin üst katı mesâha oldukda, tûlen ve arzan hesâb-ı şatrancî üzre üç yüz altmış zirâ‘ olup her zirâ‘ı ellişer akçeden on sekiz bin akçe, zikr olunan iki bâb odaların ve üzerinde olan üç bâb odaların döşemeleri dahi mesâha olundukda, tûlen ve arzan bi hesâb-ı mezbûr iki yüz altmış sekiz zirâ‘ olup her zirâ‘ı kırkar akçeden on bin yedi yüz yirmi akçe ve zikr olunan beş bâb odanın cümle dolma duvarları dahi mesâha olundukda, tûlen ve arzan üç yüz yirmi dokuz zirâ‘ olup her zirâ‘ı otuz beş akçeden on bir bin beş yüz on beş akçe ve üçüncü tabakada olan tahta-pûşun dört yüz keten tahtası olup her biri altışar akçeden iki bin dört yüz akçe ve otuz ağa tahtası olup her biri on beşer akçeden dört yüz elli akçe ve trabzenlerine ve ikinci tabakanın nerdübânına ve direklerine iki bin akçe ve orta tabakanın ön perdesi ve orta bölmesi için yetmiş yedi kapı sıva? tahtası olup her biri on ikişer akçeden dokuz yüz yirmi dört akçe ve tarîk-i âm tarafına mukaddemâ binâ eylediği taş duvar için cümle levâzımıyla üç bin akçe ve beyaz sıvasına cümle levâzımıyla bin beş yüz akçe ve beş odalık beş ocağına üçer yüz akçeden bin beş yüz akçe ve dört mevzi‘de perdesi olup ikisine bin akçe ve ikisine altı yüz akçe ve iki kenîfine kârîzleriyle bin iki yüz akçe, cem‘an elli bir bin beş yüz dokuz akçe olup, bu cümleden üç bin üç yüzü nakzına ihrâc olundukdan sonra bâkī elli bir bin beş yüz dokuz akçe kalıp menzil-i mezkûru müceddeden binâ olunan mevâzi‘inin meblağ-ı merkūm ile ta‘mîre tahammülü olduğun mi‘mârân-ı mezbûrân ile sâir ahâlî-i vukūf ve erbâb-ı ebniye ve sukūf icmâ‘ vü ittifâk ile tahmîn eylediklerin mevlânâ-yı mezbûr mahallinde tahrîr edip, ba‘dehû gelip meclis-i şer‘de inhâ vü tahrîr etmeğin, mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir min şehri Rebî‘ilevvel li sene seb‘a ve ışrîn ve elf.
Şuhûdü’l-hâl: Es-Seyyid Ömerî b. Muhyiddin, Ahmed Halife el-imâm, Fethullah b. Mehmed, el-Hâc Şaban b. Abdullah.
|