.:: İstanbul Kadı Sicilleri ::.


İstanbul Mahkemesi 3 Numaralı Sicil (H.1027/ M. 1618)
cilt: 13, sayfa: 133
Hüküm no: 132
Orijinal metin no: [14a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yorgi v. Yani’nin, binayı meyhâneye dönüştürmemesi

Mahmiye-i İstanbul’da Alaca mescid’de bi’l-fi‘il imâm olan İbrahim Halife b. Şaban ve müezzini Abdurrahman Halife b. Ata ve Mahmud Efendi b. Kābil ve Şaban Çavuş ve Yusuf b. Abdullah nâm nüvvâb-ı sultânî ve Mahmud b. Hızır ve sâirleri meclis-i şer‘-i şerîfde Yorgi v. Yani nâm [zimmî] mahzarında takrîr-i kelâm ve ta‘bîr ani’l-merâm edip, mezbûr Yorgi mahalle-i mezbûrede vâki‘ menziline müceddeden binâ ihdâs edip meyhâne etmek murâd eder. Mahall-i mezbûr meyhâne olduğu takdîrce ahâlî-i mahalle bir alay fâsık ve fâcir belâsından mütezarrır olduklarından mâ‘adâ mahallemizde vâki‘ mescidde kemâ yenbağī ibâdetimize mâni‘ olurlar suâl olunup men‘ olunmasın taleb ederiz dediklerinde, gıbbe’s-suâl mezbûr Yorgi cevâbında fi’l-hakīka zikr olunan menzili müceddeden binâya muhtâc olan mevâzi‘in tecdîd ve meremmete ihtiyâcı olan yerlerin ta‘mîr ederim, lâkin menzil-i mezbûru meyhâne etmek niyetine ta‘mîr [etmedim] dedikde, menzil-i mezbûru meyhâne etmemek için mezbûr Yorgi’ye savb-ı şer‘den tenbîh olunup, mâ vaka‘a bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Rebî‘ilevvel li sene seb‘a ve ışrîn ve elf.


Şuhûdü’l-hâl: Murad b. Mehmed, Kara Mustafa, Musli b. Cafer, Yahya b. Abdullah, Ahmed b. Mehmed ve gayruhüm.