Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 139 Hüküm no: 107 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Maden’in, Ali Ağa aleyhindeki köle davasından men olunması Efendi hazretleri imzâsıyladır, hüccet, isbât-ı hîbe-i abd Medîne-i Üsküdar’da Toygar Tepesi? mahallesi ahâlîsinden olup hâssa tabbâhlardan olan el-Hâc Mehmed b. Ma‘den nâm kimesne Dîvân-ı hümâyûn-ı sa‘âdet-makrûnda akd olunan meclis-i şer‘-i şerîfde işbu bâ‘isü’l-kitâb Ali Ağa b. Muzaffer nâm kimesne mahzarında üzerine da‘vâ ve takrîr-i kelâm edip mezbûr Ali Ağa’nın yedinde olan işbu orta boylu açık kara kaşlı kara gözlü Eflakiyyü’l-asl Ahmed b. Abdullah nâm gulâm mülküm olup târîh-i kitâbdan on altı sene mukaddem mezbûr Ali Ağa’ya tahmînen beş yaşında iken îdâ‘ ve teslîm, ol dahi istîdâ‘ ve tesellüm etmiş idi, suâl olunup mevsûf-ı mezbûru bana teslîme mezbûr Ali Ağa’ya tenbîh olunmak matlûbumdur dedikde gıbbe’s-suâl, mezbûr Ali Ağa cevâbında müdde‘î-i mezbûr mevsûf-ı mezbûru târîh-i mezbûrda tahmînen beş yaşında iken bana hîbe ve teslîm, ben dahi ittihâb ve kabûl ve tesellüm etmiş idim deyü def‘ ile mukābele edicek gıbbe’s-suâl ve’l-inkâr mezbûr Ali Ağa’dan def‘-i mezbûrunu mübeyyine beyyine taleb olundukda mahmiye-i İstanbul’da Ayasofya-i kebîr mahallesi sükkânından olup Dergâh-ı âlî kapıcılarından olan Mehmed Bey b. Mustafa ve Şengel hamamı kurbünde sâkin Hasan Çavuş b. Hamza nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr târîh-i kitâbdan on altı sene mukaddem mevsûf-ı mezbûru tahmînen beş yaşında iken mezbûr Ali Ağa’ya bizim huzûrumuzda hîbe ve teslîm [ve] mezbûr Ali Ağa dahi ittihâb ve kabûl ve kabz ve tesellüm etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr vech-i mübeyyen üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâmin min-Cumâdelâhire li-sene ihdâ ve semânîn ve elf. Şuhûdü’l-hâl: Mansur Ağa b. Mustafa, Mehmed Çelebi b. Bayram, Mehmed Halîfe el-müezzin-i Câmi‘-i Ayasofya, Mustafa Çelebi b. el-Hâc Ahmed, İbrahim Çelebi b. Mehmed.