Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 140 Hüküm no: 108 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülistan Hatun’un menzil ve müştemilatını Ahmed Beşe’ye satması Mahmiye-i İstanbul’da Hadîce Sultan mahallesi sâkinelerinden Gülistan Hatun bt. Abdullah tarafından husûs-ı âti’l-beyâna vekîl olup mezbûreyi ma‘rifet-i şer‘iyye ile ârifân olup mahalle-i mezbûre ahâlîsinden Ahmed Beşe b. Ali ve Mustafa Çelebi b. Ahmed şehâdetleriyle şer‘an vekâleti sâbite olan Sinan b. Yusuf meclis-i şer‘i- şerîf-i enverde medîne-i hazret-i Ebâ Eyyûbe’l-ensârî -radiye anhu Rabbühü’l-bârî- kazâsı muzâfâtından Terkos nâhiyesine tâbi‘ Dursun nâm karye ahâlîsinden işbu râfi‘ü’l-kitâb Ahmed Beşe b. Hasan mahzarında bi’l-vekâle ikrâr ve takrîr-i kelâm edip müvekkile-i mezbûrenin silk-i mülkünde münselik olup karye-i mezbûrede vâki‘ bir tarafdan Hasan Ağa mülkü ve bir tarafdan Mustafa mülkü ve bir tarafdan Baltazâde Mehmed mülkü ve bir tarafdan tarîk-i âm ile mahdûd olup bir bâb fevkānî ve bir bâb tahtânî oda ve bir samanhâne ve bir anbâr ve bir su kuyusu ve bir mikdâr bağ ve eşcâr-ı müsmire ve gayr-ı müsmireyi müştemil mülk menzilini mezbûr Ahmed Beşe’ye fıddî râyicü’l-vakt on üç bin akçeye bey‘-i bâtt ile bey‘ ve teslîm edip ol dahi iştirâ ve tesellüm eyledikden sonra semen-i mezbûr on üç bin akçeyi müvekkile-i mezbûre Gülistan mezbûr Ahmed Beşe yedinden tamâmen ahz u kabz eyledi, ba‘de’l-yevm menzil-i mahdûd-ı mezbûr merkūm Ahmed Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: el-Hâc Mustafa b. el-Hâc Mehmed, Ali b. Bali, Kenan b. Abdullah, Mahmud b. Abdullah, Pervane oğlu Ali.