Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 140 Hüküm no: 109 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Budin Muhafızı İbrahim Paşa’nın yalısını kızı Ayşe Hanım’a satması Husûs-ı âti’l-beyânın mahallinde tahrîri iltimâs olunmağın sâbıkā mahmiye-i İstanbul’da sadâret-i uzmâ ve vekâlet-i kübrâ kāimmakāmı olup hâlâ Budin muhâfazasına memûr olmağla müteveccih olan düstûr-ı ekrem müşîr-i efham nizâmü’l-âlem müdebbirü umûri’l-cumhûr bi’l-fikri’s-sâkıb mütemmimu mehâmmü’l-enâm bi’r-re’yi’s-sâib vezîr-i âsaf-nişân İbrahim Paşa -dâme birruhû ve feşâ- hazretlerinin mahmiye-i mezbûrede Aksaray kurbünde Murad Paşa-i atîk mahallesinde vâki‘ sa‘âdet-hânelerine varılıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf olundukda Paşa-i müşârün-ileyh hazretleri meclis-i ma‘kūd-ı mezbûrda sadriye kebîre kızı umdetü’l-muhadderât zübdetü’l-muvakkarât bâ‘isü’l-kitâb Âişe Hanım tarafından ikrâr-ı âti’l-beyânı tasdîka vekîl olup vekâleti bimâ-hüve tarîku’s-sübût şer‘an sâbite olan fahrü’l-a‘yân Musa Beşe b. Mehmed muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup medîne-i hazret-i Ebâ Eyyûbe’l-ensârî -radiye anhu Rabbühü’l-bârî’de- mahallesinde vâki‘ bir tarafdan umdetü’l-mevâli’l-izâm İshakzâde Mehmed Efendi mülkü ve bir tarafdan sulbiye sagīre kızım Hadîce Hanım’ın mülkü ve bir tarafdan sâhil-i bahr ve bir tarafdan âhar mülküm ile mahdûd olup fevkānî altınlı bir kebîr oda ve bir kebîr orta sofa ve bir yan sofa ve biri kebîr ve biri sagīr altınsız iki bâb oda ve iki kenîf ve bir mermer musluk ve müşterek mâ-beyn duvarı ve zât-ı eşcâr-ı müsmire ve gayr-ı müsmire hadîka-i azîmeyi ve şadırvanı müştemil yalı ta‘bîr olunur menzilimi cümle tevâbi‘ ve levâhıkı ve kâffe-i hukūk ve merâfıkı ile kızım müvekkile-i mûmâ-ileyhâya tarafeynden îcâb ve kabûlü hâvî şurût-ı müfsideden ârî bey‘-i bâtt ile beş bin esedî guruşa bey‘ ve teslîm ve müvekkilem mûmâ-ileyhâ dahi iştirâ ve tesellüm etdiğinden sonra semen-i mezbûr beş bin esedî guruşu müvekkile-i mûmâ-ileyhâ Âişe Hanım’a hîbe, ol dahi ittihâb ve kabûl eyledi. Min-ba‘d menzil-i mahdûd-ı mezbûre müvekkile-i mûmâ-ileyhânın mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Umdetü erbâbi’t-tahrîr ve’l-kalem Tezkireci Osman Efendi, Mehmed Efendi b. İbrahim el-imâm, Mahmud Efendi b. Muharrem, Hamamcı Hasan Efendi, İbrahim Çelebi b. ( ), umdetü’l-akrân Ali Ağa b. Ahmed kâtib, zahrü’l-emsâl ve’l-akrân Hazînedâr Mustafa Ağa, fahrü’l-akrân Çukadâr Ahmed Ağa, Mehmed Ağa b. Hasan.