Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 141 Hüküm no: 110 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Budin Muhafızı İbrahim Paşa’nın menzilini kızı Hatice Hanım’a satması Husûs-ı âti’l-beyânın mahallinde tahrîri iltimâs olunmağla Dârü’s-saltanati’s-seniyye Kostantıniyyetü’l-mahmiye’de sâbıkā sadâret-i uzmâ ve vekâlet-i kübrâ kāimmakāmı olup hâlâ Budin muhâfazasına memûr olunmağla müteveccih olunan düstûr-ı ekrem müşîr-i efham müdebbirü umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib vezîr-i âsaf-nişân İbrahim Paşa -dâme birruhû ve feşâ- hazretlerinin mahmiye-i mezbûrede Aksaray kurbünde Murad Paşa-i atîk mahallesinde vâki‘ sa‘âdethânelerine varılıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf olundukda paşa-i müşârün-ileyh hazretleri meclis-i ma‘kūd-ı mezbûrda sulbiye sagīre kızı Hadîce Hanım’ın vâlidesi umdetü’l-muhadderât zübdetü’l-muvakkarât Adilhân Hatun bt. el-Hâc Hasan tarafından husûs-ı âti’l-beyâna vekîl olup vekâleti bimâ-hüve tarîku’s-sübût şer‘an sâbite olan umdetü’l-eşbâh Mustafa Ağa b. ( ) mahzarında ikrâr-ı tâm ve takrîr-i kelâm edip akd-i âtî sudûruna değin hâriciyesi kebîre kızım Âişe Hanım’ın mülkü ve dâhiliyesi benim mülküm olup mahalle-i mezbûrede vâki‘ üç tarafdan tarîk-i âm ve bir tarafdan fahrü’l-eşbâh Tezkireci Osman Efendi mülkü ile mahdûd menzilin dâhiliyesi fevkānî iki bâb kebîr ve üç bâb sagīr oda ve bir orta sofa ve bir yan sofa ve bir kenîf ve iki halvetli bir kenîfli bir hamam ve tahtânî üç bâb oda ve bir kenîf ve bir orta sofa ve bir tahta-pûş ve üç su kuyusu ve zât-ı eşcâr-ı müsmire ve gayr-ı müsmire hadîka ve iki halvetli bir câmekânlı ve bir kenîfli bir hamam ve bir mahzen ve bir havuz ve bir matbah ve müşterek bir mâ-beyn duvarı ve kanavât-ı müsennât ile muharrer dört masura su cârî müşterek mahzen-i kebîr[i] müştemil olup [23b] dâhiliye ta‘bîr olunan müfrez menzilimi müvekkile-i mûmâ-ileyhâ Adilhân Hatun’a tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yirmi bin guruşa bey‘ ve teslîm, ol dahi sagīre-i mûmâ-ileyhâ Hadîce Hanım için iştirâ ve tesellüm etdiğinden sonra semen-i mezbûr yirmi bin esedî guruşu sagīr-i mûmâ-ileyhâ Hadîce Hanım’a hîbe edip vâlidesi müvekkile-i mûmâ-ileyhâ Adilhân Hatun dahi ittihâb ve kabûl eyledi. Min-ba‘d dâhiliye menzil-i mezbûr sagīr-i mûmâ-ileyhâ Hadîce Hanım’ın mülk-i müşterâsıdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Cemâziyelâhire li-sene ihdâ ve semânîn ve elf. Şuhûdü’l-hâl: Es-sâbikūn.