Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 142 Hüküm no: 111 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sernek v. Simon’a olan borcu ödemesi için Viskan’a tenbihte bulunulması Hüccet-i havâle, Efendi hazretleri imzâsıyladır. Mahmiye-i İstanbul’da Vezir Hanı demekle ma‘rûf handa sâkin bâzergân tâifesinden bâ‘isü’s-sifr Sernek v. Simon nâm zimmî meclis-i şer‘-i şerîfde Viskan v. Hirosib nâm zimmî muvâcehesinde üzerine da‘vâ ve takrîr-i kelâm edip Dülbendçi Acem tâifesinden olup bundan akdem hâlik olan Avanos v. Makroviç nâm zimmî zimmetinde Acem metâ‘ı bahâsından dört yüz yirmi beş esedî guruş hakkım olup mezbûr Makroviç’in dahi deyn-i şer‘îden mezbûr Vistan zimmetinde dört yüz yirmi beş guruş hakkı olmağla hâlik-i mezbûr hayâtında cihet-i mezbûreden bana deyni olan meblağ-ı mezbûr dört yüz yirmi beş esedî guruş için üçümüz bir yerde iken cümle rızâsı ile beni mezbûr Viskan üzerine havâle-i sahîha-i şer‘iyye ile havâle edip mezbûr Viskan dahi havâle-yi mezbûreyi kabûl etmiş idi, suâl olunup havâle-i mezbûreye binâen meblağ-ı mezbûrun mezbûr Viskan’dan alıverilmesi matlûbumdur dedikde, gıbbe’s-suâl mezbûr Viskan cevâbında ben hâlik-i mezbûr hayâtında deynimi edâ etmiş idim deyüp havâle-i mezbûreyi ve kabûlünü inkâr etmeğin müdde‘î-i mezbûrdan müdde‘âsını mübeyyine beyyine taleb olundukda han-ı mezbûrda sâkin bâzergân tâifesinden Kirkor v. Yakob ve Valide Hanı’nda sâkin tâife-i mezbûreden İhtiyar v. Avakini nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka hâlik-i mezbûr Avanos hayâtında müdde‘î-i mezbûru cihet-i mezbûreden deyni olan dört yüz yirmi beş esedî guruş için medyûnu mezbûr Viskan üzerine üçü bir yerde iken cümlesinin rızâsı ile havâle-i sahîha-i şer‘iyye ile havâle edip mezbûr Viskan dahi havâle-yi mezbûreyi kabûl etmiş idi, havâle-i mezbûreye binâen meblağ-ı mezbûr dört yüz yirmi beş esedî guruşu müdde‘î-i mezbûre edâ mezbûr Viskan üzerine lâzımdır, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr dört yüz yirmi beş esedî guruşu müdde‘î-i mezbûra edâya merkūm Viskan üzerine hükm-i sahîh-i şer‘î ile hükmolunmağın mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Cemâziyelâhire li-sene ihdâ ve selâsîn ve elf. Şuhûdü’l-hâl: Mustafa Çavuş b. Abdülmennan el-mübâşir, Mehmed Çavuş b. Osman, İdris Çavuş b. Mustafa, Ahmed Çavuş b. Hüseyin.