Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 143 Hüküm no: 112 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ermeni Hanis’in Divriği kazasının Kesme köyündeki bağını Kasber’e satması Vilâyet-i Anadolu’da Divriği kazâsına tâbi‘ Kesme nâm karye sükkânından Hanis v. Gazil nâm Ermeni meclis-i şer‘-i hatîr-ı lâzımü’t-tevkīrde yine karye-i mezbûre sükkânından işbu bâ‘isü’s-sifr Kasber v. Marat nâm Ermeni muvâcehesinde ikrâr ve takrîr-i kelâm edip karye-i mezbûre hudûdu dâhilinde vâki‘ bir tarafdan Beyler nâm Ermeni bağına ve bir tarafdan Kohan nâm Ermeni bağına ve bir tarafdan kayaya ve bir tarafdan tarîk-i âmma müntehî bir kıt‘a mülk bağımı bi-cümleti’t-tevâbi‘ ve’l-levâhık mezbûr Kasber’e otuz kıt‘a esedî guruşa bey‘-i bâtt-ı sahîh-i şer‘î ile bey‘, ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr otuz kıt‘a esedî guruşu müşteri-yi mezbûr Kasber yedinden tamâmen ahz u kabz edip meblağ-ı mezbûru mahallinde kabza mezbûr Kasber’i taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Gazanfer b. Tevekkel, Mehmed b. Ramazan, Matuk v. Haçok.