İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 175 Hüküm no: 205 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi’nin b. Hüseyin’in Mosi’ye sorguç bedelinden borçlu olduğu Mefharü’l-a‘yân Mustafa Çelebi b. Hüseyin meclis-i şer‘-i şerîfde Yahud tâ’ifesinden Mosi v. David ve Liya bt. Yakut nâm Yahudiler muvâcehelerinde üzerine da‘vâ edip, gāib ani’l-meclis olan Mosi nâm Yahudi zimmetinde bir murassa‘ altın sorguç bahâsından iki yüz kırk bin akçe hakkım olup, meblağ-ı merkūmun cümlesine mersûm Mosi v. David ve merkūme Liya’nın her biri emr ve kabûlü hâviye kefâlet ile kefîl olmağla, meblağ-ı merkūmu mezbûrândan taleb ederim dedikde, gıbbe’s-suâl merkūmân Yahudiler cevâblarında müdde‘î-i merkūm Mustafa Çelebi’nin gāib-i merkūm Mosi zimmetinde sorguç bahâsından ancak yüz seksen bin akçe hakkı olmağla, biz merkūm Mosi’nin nefisine kefîl olmuş idik. Târih-i kitâbdan bir ay tamamına değin merkūm Musa bulup merkūma teslîm etmezsen meblağ-ı merkūm yüz seksen bin akçeyi merkūm Mustafa Çelebi’ye biz edâ edelim dediklerinde, mâ vaka‘a gıbbe’t-taleb ketb olundu. Tahrîren fi’l-yevmi’l-âşir min şehri Rebî‘ilâhir li sene seb‘a ve ışrîn ve elf. Şuhûdü’l-hâl: Muzaffer Ağa b. ( ) el-Bevvâbü’s-sultânî, Murad b. Mehmed, Celil b. Hüdâverdi ve gayruhüm.