Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 144 Hüküm no: 114 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirhan Hatun’un Gürcü asıllı cariyesi Gülistan’ı azat etmesi Mahmiye-i İstanbul’da Mismârî Şücâ‘ mahallesinde sâkine Demirhan Hatun bt. Abdullah meclis-i şer‘-i şerîf-i enverde rıkka inkıyâdı zâhire ve mütehakkık olan işbu orta boylu kara gözlü, kara kaşlı Gürciyyetü’l-asl hâfızatü’l-kitâb Gülistan bt. Abdullah muvâcehesinde ikrâr ve takrîr-i kelâm edip ıtk-ı rakabât a‘zam-ı kurbât ve vesîle-i ref‘-i derecât ve sebeb-i duhûl-i cennât-ı âliyât olduğundan mâ‘adâ mu‘takın ıtkı mukābelesinde mu‘tıkın cemî‘ uzvu nârdan âzâd olduğunu nâtık hadîs-i şerîfin mefhûmuna muttali‘a olmağın mevsûfe-i mezbûreyi hasbeten lillâhi te‘âlâ ve haseneten li-rûh-i rasûlillâhi’l-mu‘allâ tahrîr ü i‘tâk ve zümre-i harâir-i asliyâta idrâc ü ilhâk eyledim, ba‘de’l-yevm mevsûfe-i mezbûre sâir ahrâr-ı asliyât gibi hürre olup üzerinde mevâlî için şer‘an sâbit olan hakk-ı velâ-yı şer‘îden gayrı hakkım kalmamışdır dedikde mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Abdullah Efendi b. İbrahim, Mahmud Çelebi b. Halil, Mehmed Efendi el-müezzin, el-Hâc Ali, Abdülkerim b. Abdullah.