Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 145 Hüküm no: 115 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şam kadısı İlahizade Mehmed Efendi’nin vefat eden Şeyhülislam Sunizade Mehmed Efendi’nin küçük oğlu Sunullah’ın malından istiğlâl yoluyla aldığı borcu ödediği Hüccet, fekk-i rehin Husûs-ı âti’l-beyânı mahallinde tahrîr için gıbbe’l-iltimâs kıbel-i şer‘-i mutahhardan Mevlânâ Keşfî Mustafa Efendi irsâl olunup ol dahi hâlâ Şam-ı şerîf kādısı olan umdetü’l-mevâli’l-izâm zübtedü’l-fudalâi’l-fihâm İlahizâde Mehmed Efendi’nin mahmiye-i İstanbul’da Molla Ahî mahallesinde vâki‘ menzillerine varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘-i şerîf eyledikde asrında Şeyhülislâm olup ma‘zûlen vedâ‘-ı âlem-i fânî eden merhûm ed-dâricü ilâ-medârici Rabbihi’l-kayyûm Sun‘îzâde es-Seyyid Mehmed Emin Efendi’nin sagīr oğlu zübdetü’l-mehâdimü’l-kirâm es-Seyyid Sunullah Çelebi’nin kıbel-i şer‘den mansûb vasîsi olan umdetü’l-a‘yân Mehmed Ağa b. Abdülmennan meclis-i ma‘kūd-ı mezbûrda işbu kitâbın sâhibi mûmâ-ileyh İlahizâde Mehmed Efendi taraflarından husûs-ı âti’l-beyâna sâbitü’l-vekâle vekîli olan kuzât-ı Mısriye’den mahalletü’l-kübrâdan ma‘zûl fahrü’l-kuzât zübdetü’l-vülât Abdülmümin Efendi b. Mustafa Ağa mahzarında bi’l-vesâye ikrâr ve takrîr-i kelâm edip müvekkil-i mûmâ-ileyh Mehmed Efendi bin seksen senesi şehr-i Ramazani’l-mübâreki’nin on yedinci gününde mahalle-i mezbûrede vâki‘ bir tarafdan ba‘zan Mustafa Ağa veresesi ve ba‘zan Hacı Sinan Ağa mülkleri ve bir tarafdan merhûm Molla Ahî Evkāfı’ndan mukāta‘a-i ma‘lûme ile mûmâ-ileyh Mehmed Efendi’nin tasarrufunda olan arsa ve bir tarafdan evkāf-ı mezbûrdan icâreteyn-i ma‘lûmeteyn ile tasarrufunda olan menzil ve bir tarafdan tarîk-i âm ile mahdûd dâhiliye ve hâriciyede büyût-ı adîde ve hadîkayı müştemil işbu menzili bi-cümleti’t-tevâbi‘ üç bin beş yüz kıt‘a esedî guruşa bi-tarîkı’l-istiğlâl bana bey‘ ve teslîm, ben dahi sagīr-i mûmâ-ileyhin yedimde olan malı ile iştirâ ve kabûl ve tesellüm ve def‘-i semen edip ba‘de’t-tahliyeti’ş-şer‘iyye ve’t-tekābuzü’l-mer‘î târîh-i mezbûrdan altı ay tamâmına değin iki yüz altmış iki buçuk kıt‘a esedî guruşa yine mûmâ-ileyhe îcâr ve teslîm, ol dahi istîcâr ve kabûl ve tesellüm etmiş idi, hâlâ semen-i merkūm üç bin beş yüz esedî guruş ile altı ayda müctemi‘ olan iki yüz altmış iki buçuk icâreyi vekîl-i mûmâ-ileyh Abdülmümin Efendi yedinden bi’t-tamâm ahz u kabz edip menzil-i mezbûru fekk-i rehn ve kasr-ı yed eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû irsâl olunan Mehmed b. Ramazan ve Hüseyin b. Ebubekir ile meclis-i şer‘a gelip alâ-vukū‘ihi inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelâhire li-sene ihdâ ve semânîn ve elf. Şuhûdü’l-hâl: Umdetü’l-mevâli’l-izâm Hâfız Mustafa Efendi, Abdullah Efendi b. Süleyman, Feyzullah Efendi b. Mehmed, Abdulkadir Çelebi b. Ali, Yusuf b. Abdullah.