Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 146 Hüküm no: 116 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un eşi Ali’den muhâlaa yoluyla boşanması Mahmiye-i İstanbul’da Nevbahar mahallesinde sâkine Havva Hatun bt. Abdullah meclis-i şer‘-i şerîf-i enverde zevc-i dâhilün-bihâsı olan işbu râfi‘ü’l-kitâb Ali b. Abdullah muvâcehesinde ikrâr ve takrîr-i kelâm edip zevcim Ali zimmetinde mütekarrir olan beş bin akçe mehr-i müeccelim ve nafaka-i iddet-i ma‘lûmem ve eşyâ-i memlûkemden mezbûr Ali’ye teslîm, ol dahi tesellüm etdiği bir Keşmir şal ve bir yemenî yorgan ve sarı velence ve bir boğça ve bir don ve bir gömlek [ve] ulanmış? dâne kehber[kehriba] tesbîh üzerlerine ve meûnet-i süknâm dahi kendi üzerime olmak üzere mezbûr Ali ile muhâla‘a edip ol dahi hul‘-ı mezbûru kabûl etdiğimden sonra hukūk-ı zevciyete müte‘allıka âmme-i de‘âvî ve mutâlebât ve eymân ve muhâsamâtdan her birimiz âharın zimmetini ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelûlâ li-sene ihdâ ve semânîn ve elf. Şuhûdü’l-hâl: Mehmed Çavuş b. Osman, Mehmed ser-oda, fahrü’l-akrân Mehmed Ağa b. Abdullah, Cafer Çelebi b. Ser-asker