İstanbul Mahkemesi 3 Numaralı Sicil (H.1027/ M. 1618) cilt: 13, sayfa: 187 Hüküm no: 226 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Receb’in Yasef’ten alacaklı olduğu Bâ‘isü’l-kitâb Ayşe bt. Receb nâm hâtun mahfil-i kazâda, Roza bt. Peram nâm Yahudiye mahzarında takrîr-i da‘vâ edip, bundan akdem iki yakası ayaklı ortası elmas taşlı bir küpeyi Kedüz? cemâ‘atinden Yasef nâm Yahudi’ye otuz dört bin akçeye bey‘ ve teslîm edip, yirmi bin akçesin yedinden alıp kabz edip on dört bin akçesi zimmetinde kalıp, meblağ on dört bin akçeye emr ve kabûlü hâviye kefâlet ile mezbûra Roza kefîl olmuş idi. Meblağ-ı merkūmu kefâleti cihetiyle taleb ederim dedikde, gıbbe’s-suâl mezbûre Roza kefâlet-i mezbûreyi bi’l-külliye inkâr edip, gıbbe’l-istişhâd udûlden İsa b. İlyas ve Musa b. İlyas nâm kimesneler mahfil-i kazâda hâzırân olup, fi’l-vâki‘ zikri sâbık küpe semeninden mezbûr Yasef zimmetinde olan on dört bin akçeye emr ve kabûlü hâviye kefâlet ile [bizim huzûrumuzda kefîl oldu] biz bu husûsa şâhidleriz, şehâdet dahi ederiz dedikleri[nde] ba‘de’t-ta‘dîl ve’t-tezkiye şehâdetleri makbûle olup, mûcebi ile hükm birle, bu hurûf gıbbe’t-taleb ketb ü tahrîr olunup yed-i talebine def‘ olundu. Tahrîren fi’l-yevmi’l-hâmis aşer min [şehri] Rebî‘ilâhir sene seb‘a ve ışrîn ve elf. Şuhûdü’l-hâl: Hüseyin Çavuş el-mübâşir, el-Hâc Ali b. Abdullah kethüdâ’ü’l-muhzır, Mustafa b. Hamza, Mehmed Çelebi b. Ahmed.